Dedication, 1608-10-23, Anonymous (Israel Harvet) to Jacob Alstein
| Author: | Anonymous [Israel Harvet] |
| Recipient: | Jacob Alstein |
| Type: | Dedication |
| Date: | 23 October 1608 |
| Place: | Orléans |
| Pages: | 6 |
| Language: | Latin |
| Quote as: | https://www.theatrum-paracelsicum.com/index.php?curid=2769 |
| Editor: | Edited by Julian Paulus |
| Source: | Hermetis Trismegisti tractatus vere aureus, ed. Dominicus Gnosius, Leipzig: Valentin Am Ende for Thomas Schürer 1610, sig. )(5r-)(7v [BP.Harvet.1610-01]
|
| Translation: | Raw translation see below |
| Back to Paratexts Back to Texts by Israel Harvet |
[sig. )(5r] Philosopho ter Maximo, Theosopho : Jurisperito : Medico Hoc est, Comiti Palatino Dn. Jacobo Alsteinio Patritio Romano: Equiti aurei calcaris, & Regiæ Majestati in Gallijs à consilijs valetudinis. S[alutem] P[lurimam] D[icit].
Quemadmodum Chymici Philosophi solent omnes mundi Lapides in tres præcipuos, tanquam generales reducere, in animalem videlicet, vegetalem & mineralem: Sic Tu quoque, Alsteini, vir inclyte, Patrone & Mecœnas [sig. )(5v] summe observande, qui à cunctis nomen habes Lapidibus, hac principali nominum triplicitate conspicuè adornatus, instar stellæ matutinæ præ multis alijs fulges: & sic es Theosophus: Jurisperitus; & medicus. Liberæ enim ac supercœlestis Civitatis municeps factus, hanc à Template:MarkupSmallcapsItalic nactus es gratiam, ut cum quibus vis, etiam summi judicij Theologis conferre poßis. Aurei verò calcaris Eques, imperterrefacto animo accipis armaturam, & armas te ad Pseudojuridicorum, passim hinc in mundo occursantium ultionem. Induis enim pro thorace justitiam, & accipis pro Galeâ judicium certum: & sumis tandem scutum inexpugnabile æquitatis, ut illos in auream justitiæ veritatisq́ue viam reducas. Quanta etiam tua sit in Medicinâ præstantia, novit non tantum Gallia: verùm Anglia, Belgia, Helvetia, [sig. )(6r] Italia, Bohemia, Moravia, Hungaria, Polonia: imò tota etiam Germania. Quapropter non solùm Reges & Principes te magnifaciunt; sed summum totius Romani Imperij caput, te aliquoties ad colloquium Sophicum spontè accersi jußit. Ut autem paucis multa complectar, tot tantosq́ue honorum titulos unicus sub se comprehendit Comitatus Palatinatus, hoc est Privilegium & libertas in splendidißimum & sacrum Philosophorum palatium ingrediundi: ex quo solo hujusmodi dignitatum ornamenta, tanquam spolia Achyllis ex bello Trojano reportasti. Sed quæris fortaßè, quisnam ego sim Anonymus, qui tam audacter te compellare audeam? Dicam id, & hoc quidem Disticho:
Ignis me genuit: sic nomen ab igne resumo:
Non secus ac Lapidis tu quoque nomen amas,
Jam quidem satis me nosse debebas: sed [sig. )(6v] propter alios imbecillioris judicij, nominis mei rationem luculentiùs exponam. Vulcani naturam habeo, omniaq́ue corpora, quibus cunque subijcior, temporis longinquitate demulceo, & in meam verto naturam subtilem & spiritualem: imò lapidem ipsum, quamvis compactißimum & Adamantis instar durißimum, tandem flecto, solvo, & in tantam adduco mollitiem, ut ceræ iinstar fluat. Mollior hactenus, an durior mihi factus sis, ô Alsteini, nondum sat constat. Hoc tamen scio, quia & Jacob diceris, me jampridem à te supplantatum. Sed diuturniori hac supplantatione quid quæso effectum iri putas? supplantator nimirum Tu, me tandem victorem sine dubio reddes: sicq́ue Tu Jacobus, ego verò, qui igneâ virtute tandem prævalebo, Israel vocabimur: & sub duobus his nomini- [sig. )(7r] bus, uno eodemq́ue animorum consensu & conspiratione, constanter invicem juncti permanebimus. Ulterius nihil addens de nomine, hunc saltem fœtum meum Philosophicum, abortium quidem & tumultuarium tibi legendum examnandumq́ue offero: in quo præter infinita alia, quæ brevitatis causa nunc omitto, hoc unum haud dubiè improbabis, quod à consveto Philosophorum tramite discedens, de tantis mysterijs, paulò liberiùs, quàm par sit, scribam. Sed utut se res habeat, non tamen id, qualecunque tandem sit, rudiori promiscuæq́ue plebeculæ objectandum esse censui, priusquàm tuæ subijcerem censuræ. Multo enim rerum usu, me longè antecellis, ita ut tuo judicio, tanquam firmo & solido lubens meritòq́ue acquiescam. Te igitur vehementer etiam atque etjam rogatum volo: ut id placido sere- [sig. )(7v] noq́ue accipias vultu: meq́ue tibi unicè commendatum habeas: majora verò magisq́ue expolita aliquando à me, si Deus longiorem mihi vitæ usuram concesserit, expectes. Vale. Aurelijs ad Ligirim, 23. Octobr[is] Anno recuperatæ salutis 1608.
Tuæ Magnif[icientiae] Subjectissimus Anonymus.
Sap[ientiae] 3.
Fulgebunt justi, & tanquam scintillæ in arundineto discurrent.
English Raw Translation
Generated by ChatGPT-4 on 13 July 2023. Attention: This translation is a machine translation by artificial intelligence. The translation has not been checked and should not be cited without additional human verification.
