Dedication, 1590-01-01, Giacomo Castelvetro to Frederick IV, Elector Palatine
| Author: | Giacomo Castelvetro |
| Recipient: | Friedrich II., Kurfürst von der Pfalz |
| Type: | Dedication |
| Date: | 1 January 1590 |
| Place: | London |
| Pages: | 2 |
| Language: | Latin |
| Quote as: | https://www.theatrum-paracelsicum.com/index.php?curid=3035 |
| Editor: | Edited by Julian Paulus |
| Source: | Thomas Erastus, Varia opuscula medica, ed. Giacomo Castelvetro, Frankfurt am Main: Johann Wechel for Giacomo Castelvetro 1590, sig. [unsigned]2r–[unsigned]2v [BP.Erastus.1590-01]
|
| Translation: | Raw translation see below |
| Back to Paratexts Back to Texts by Giacomo Castelvetro |
[sig. [unsigned]2r] Illvstrissimo Principi, Friderico, Illvstriss[imi] Principis ac Domini, D[omi]n[i] Lvdovici, Comitis Palatini ad Rhenum, Bauariæ ducis, ac S[acri] R[omani] Imperii Archidapiferi & Electoris, felicis memoriæ filio, & heredi, D[omi]n[o] suo clementissimo, Iacobvs Castelvitrevs senior S[alutem] P[lurimam] D[icit].
Cvm iam ab hinc triennium, Serenißime Princeps Elector, doctißimi viri Thomae Erasti olim vxorem, mihi matrimonio iunxissem, atque adeo eiusdem scripta hereditario iure consequutus essem; nunquam non in animo habui ea typis describenda curare, in communem studiosorum omnium vtilitatem. Ad quam rem duplici de caussa impellebar; primum quidem, ne clarißimum illum virum, eius scripta supprimens, tanta iniuria afficerem: deinde etiam ne horum studiorum amantes tanto fructu atque emolumento defrauarem. Quod ego quidem certe pridem præstitissem, nisi alia subinde mea me negotiola ab ea cogitatione auocassent. At vero nunc, quo tempore minus solito negotiis distineor, hoc meum consilium differre diutius nolui, ac sub auspicatißimo Cels[itudinis] Tuæ nomine vxor & ego scripta hæc euulgare statuimus, cum pluribus aliis de caußis, tum vero maxime, qoud cum omnibus constet, quanta fide semper, & obseruantia vir ille præstantissimus, primum quidem Cels[utidinis] Tuæ Auum, deinde Patrem quoque tuum coluerit, ac veneratus sit; nonsine nefario scelere in publicum sub alterius nomine edere posse ea, nos arbitrabamur; præsertim cum nobis plane constaret, Auctorem ipsum, qui semper Jllustrissimi nominis vestri studiosissimus, & obseruantissimus fuit, si vita frui longiore datum fuisset, idem omnino, quod nunc nos, aliquando præstiturum, atque hasce suas eruditione plenissimas elucubrationes Clarissimo nomini vestro consecraturum fuisse. Neque parum etiam, vt tibi hæc dicaremus, mouit, quod videremus Cels[itudinem] Tuam bonarum literarum amantissimam esse; atque insuper (cum quotidie non paucas in eis horas impendat) omnibus testatum facere, se tanto & honore & fauore eas prosequi, vt non leuem toti terrarum orbi admirationem pariat: atque adeo talem de se spem in omnium animis excitare, vt facile intelligant Cels[itudinem] Tuam non fore minus [sig. [unsigned]2v] gratam & acceptam humano generi, quam olim nobilissimi eius Maiores fuerint; quin iam commune sibi cum summo, & optimo illo Romanorum Principe encomium suis præclaris virtutibus promeruisse, vt ab omnibus Amor & deliciæ generis humani & appelletur & habeatur. Celebratissimos autem Cels[itudinis] Tuæ Maiores quod attinet, cum præclaræ eorum res gestæ, & virtutes admirandæ, neminem clam esse possint, suoque splendore non possint non omnium oculos atque animos in se conuertere, eas hîc recensere supersedebo, ac orationem meam illuc omnem conuertam, vt Cels[itudinem] Tuam ea qua decet animi submissione & obseruantia orem atque obsecrem, hoc nostrum munusculum hilari & exporrecta fronte accipere dignetur; ac si ab ipsomet Auctore oblatum fuisset: ac insuper rogamus, vt nos quoque in suam clienelam suscipere dignetur; ad quam Vxor & ego non minorem fidem, & obseruantiam allaturos confidimus, quam vel Auctor ipse, vel quiuis alius afferre possit, qui Cels[itudinem] Tuam ex intimis animi sensibus amat, colit, ac veneratur. Deus Opt[imus] Max[imus] Cels[itidinem] Tuam plurimos in annos sospitet, atque incolumen conseruet. Londoni Cal[endis] Januarij, M D XC.
English Raw Translation
Generated by ChatGPT-4 on 19 August 2023. Attention: This translation is a machine translation by artificial intelligence. The translation has not been checked and should not be cited without additional human verification.
