Dedication, 1570-01-28, Michael Toxites to Maximilian II., Kaiser

Author:	Michael Toxites
Recipient:	Maximilian II., Kaiser
Type:	Dedication
Date:	28 January 1570
Place:	Straßburg
Pages:	30
Language:	German

Quote as:

https://www.theatrum-paracelsicum.com/index.php?curid=1884

Editor:	Edited by Julian Paulus
Source:	Paracelsus, Archidoxa [...] Von heymligkeyten der Natur/ Zehen Bücher, ed. Michael Toxites, Straßburg: Theodosius Rihel [1570], sig. ):(2r–A8v [BP118]

CP:	Not in Kühlmann/Telle, Corpus Paracelsisticum

Back to Paratexts Back to Texts by Michael Toxites

[sig. ):(2r] Dem aller Durchleuchtigsten/ Großmächtigsten/ vnnd vnüberwindlichsten Fürsten vnd Herren/ Herrn Maximiliano dem II. des nammens Römischen Keyser/ zu Vngern/ vnd Böheym &c. König/ Ertzhertzogen zu Oesterreich &c. Grauen zu Tyrol &c. meinem aller gnädnigsten Herrn.

Aller durchleuchtigster/ Großmächtigster vnüberwindlichster Rö[mischer] Keyser/ Aller gnädigster Herr: Nach dem vnter allen Theophrastischen büchern so noch nit an tag kommen/ fürnemlich die Archidoxa von mäniglichen begert worden/ Also das auch die/ so der Medicin gar nit zugethon/ denen nachgestanden/ dardurch [sig. ):(2v] Theophrasto mehr spott/ dann fürderung begegnet/ So hab ich dieselbigen länger nit hinderhalten/ sonder offentlich in Truck geben wöllen.

Dann ob ich gleichwol mit andern der meynung gewesen/ daß solche hohe Arcana diser argen vndanckbaren Welt/ noch nit zu offenbarn/ So sicht man aber augenscheinlich/ daß sich das widerspil täglich zuträgt/ darauß abzunemmen/ daß Gott das Liecht/ so er in medicina durch Theophrastum Paracelsum angezündt/ länger nit im finstern bleiben lassen will.

Wiewol nuh mein fürnemmen mit diser publicierung alleyn ist dem gmeynen nutz/ vnd allen guthertzigen zudienen/ vnd nicht mein/ sonder Theophrasti Ehr hierinnen [sig. ):(3r] suche/ damit er mit seiner Lehr/ wie sie ist/ ann tag komme/ So weyß ich doch wol/ daß ich bei vilen wenig danck damit erlangen wird/ Welches ich aber von wegen der Liebe billich wenig achten soll. Dann etlich werden vber mich zürnen/ daß ich dise Bücher nit länger hinderhalten/ die meynen/ man solle die Pärlin nicht vnder die Schwein werffen. Disen gib ich kurtzlich zu antwort/ daß war ist/ wann eyn ding gemeyn wird/ kommt es als bald nit alleyn in verachtung/ vnd auß der verachtung in vergessenheyt/ sonder auch in mißbrauch/ bei denen/ die es nit verstehn/ dardurch dann vil schaden/ hohen vnd nider Stands personen/ sonderlich in medicina eruolget.

[sig. ):(3v] Zum dem andern ist auch war/ daß bei männiglichen gegen Gott/ vmb seine Gaben so grosse vndanckbarkeyt erfunden wird/ als sie jmmer sein kan. Dieweil aber Gott der Herr vns mit seiner gnaden vbertrifft/ vnd sich nit vnsere vndanckbarkeyt laß bewegen/ sonder seinen Segen auch in der Medicin etwas mehr/ dann zuuor sehen laßt/ warvmb wolten wir dann dem gnädigen willen Gottes widerstreben? Dann er hat die medicinam/ sammt der gantzen philosophj/ durch Theophrastum auß der natur/ wie sie zu der alten Vätter Adamj/ vnd der andern zeit gewesen/ nit darumb ernewert/ das sie solt verborgen sein/ sonder der gantzen Welt offenbar werden: Wie dann solches Theophrastus im [sig. ):(4r] Paragrano lang zuuor angezeygt hat/ daß sein Monarchj bleiben werde/ der medicorum aber nit/ vnd dz er mehr wöll richten nach seinem tod/ wider die medicos/ dann daruor.

Wa blibe aber sein Monarchj/ wann sie nit solt ann tag kommen? was würde er nach seim tod richten/ wann seine Schrifften länger müßten verborgen ligen? So sagt er auch in tinctura Physicorum (das alles die Medici wol solten bedencken) vnd mit nichten in den Wind schlagen/ daß sein Theoric/ welche gehe auß dem Liecht der Natur/ vnnd könde von derselben bestendigkeyt wegen/ nimmer verkehrt werden/ werde in dem Jar LVIII. anfangen zu grünen/ vnd die Practick/ so darauff volgen wird/ werde sich mit wunder- [sig. ):(4v] thaten/ vnd vngläublichen Zeychen beweisen/ dz auch die Handwercksleuth werden verstehen/ sammt dem gemeynen Pöuel/ wie Theophrastj kunst bestehe gegen der Sophisten Hudlerej.

Zu dem Tritten sein vil frommer redlicher leuth Arm vnd Reich/ welche in grosser schwerer Leibs noth stecken/ vnd mit erbärmlichen kranckheyten beladen sind/ denen hülff vnd rath on verletzung der Liebe nit mag abgeschlagen werden.

Zum beschluß bewegt mich des Johann Liechtenbergers Spruch/ da er bald im anfang seiner propheceiung also schreibt/ Wer sein eygen Gold außgräbt/ nach seinem gefallen/ der das sein mißbraucht/ vnd frembde ding nit handlet/ der thut niemand [sig. ):(5r] vnrecht/ Der aber kunst vnd bücher verhellt/ thut jedermann vnrecht/ der selb verbirgt nicht das sein/ sonder ander leuth ding zeucht er vnder/ vnd stielt sie. Darumb geb jhnen Gott wol mögen vnnd zuleben/ die kunst lieben vnd pflantzen/ vnnd damit als von dem Tod erwecken. Disen Spruch wöllen alle guthertzigen bedencken/ so Theophrastj Bücher hinder jhnen haben/ vnnd sollen das wissen/ ob wol dise Archidoxa,[[Category: ###]] tinctura Physicorum, vnnd dergleichen offentlich inn Truck außgangen/ daß sie gleichwol bej den Liebhabern der Kunst bleiben/ vnd nit gemeyn sein werden.

Der ander theyl wird voll freuden sein/ vnnd mir erstlich dancken/ der hoffnung/ daß sie da alle Kunst [sig. ):(5v] vnnd heymligkeyten der Natur bej eynander haben/ vnnd damit reich vnd selig werden wöllen. Wann sie aber in die arbeyt kommen/ vnnd nach vilem lesen/ mühe/ vnd kosten/ nichts finden (wie vilen beschehen wird/ die illotis manibus in dise Bücher fallen werden) Da wird denn das calumnijern/ schelten/ schmähen/ vnd verdammen angehn/ vnd der arm Theophrastus herhalten müssen/ als hab er die warhayt verschwigen. Dise bitt ich daß sie wöllen bedencken/ daß Theophrastus redt/ wie der Cabalisten vnd magorum naturalium brauch ist/ versteht nit allwegen daß der Buchstab anzeygt/ vnd will zu seinen Arcanen discipulos haben/ so in denen Künsten/ der im Paragrano fürstellt/ geübt [sig. ):(6r] seind/ darumb er auch im Ersten Buch Archidoxorum[[Category: ###]] selbs schreibt/ das er in disen Büchern mit den seinen reden/ nit in die commun der Völcker/ sonder den seinen verständig gnug schreiben/ wöll/ vnd mit eyner guten Mawr beschliessen. Daher wird nuh volgen/ welcher in gemeldten künsten nichts weyßt/ der wird wenig fruchtbars in Theophrasti Arcanis außrichten/ dieweil er nicht versteht/ was er thon oder lassen/ ob er weiß oder schwartz nemen soll/ Vil minder wird er beweisen/ wah er der arbeyt nit erfahren ist. Dann es will Theophrastus da er de modo administrandi medicamenta schreibt/ daß man das corpus auch inn Kreutern nit eingeben soll/ vil minder wird es in mineralibus vnnd [sig. ):(6v] metallis zu gelassen. Dann die krafft/ tugend vnd alle würckung in Essentijs, Magisterijs, Arcanis vnd Elixiribus ligt/ vnd nit in corpore, wie die erfahrung außweißt.

Daß etlich toben vnnd schreien Theophrastus habe den rechten Grund nit trewlich ann tag geben/ sonder mit verblümten worten verborgen/ daß niemand zu verstand seiner Lehr kommen möge/ dardurch den Krancken vil schadens widerfahre/ vnd wolten jhn hiedurch gern zu eynem Mörder machen/ daran thun sie vnchristlich. Dann sie solten bedencken wie vil guts Theophrastus außgericht/ vnd geschriben/ nit alleyn in Chyrurgia von Wunden/ offnen Schäden/ vnd Frantzosen/ dergleichen vor jhm keyner gethan/ [sig. ):(7r] welches alles den fleissigen wol zuverstehen ist/ Sonder auch in vilen morbis Physicis, damit er billich mehr lobs/ dann vndanck solt verdient haben/ vnd nicht also vnbillicher weise verdammt werden.

Das er aber die secreta vnd Arcana naturæ, wie sie bej den alten Vättern/ Juden vnd Heyden im brauch gewesen/ dardurch sie das lang leben/ vnnd des Leibs gesundheyt erhalten haben/ etwas obscurè wider an tag bracht/ also/ daß nit eyn jeder Bawr verstehen soll/ sonder Magisch/ damit sie bej denen bliben/ die jhrer werth sein würden/ kan jhm von allen vnparteijschen nicht für vngut gehalten werden. Dann erstlich waren die medici, so zu seiner zeit gewesen/ selber schuldig daran/ wel- [sig. ):(7v] che jhme den Truck versperret/ mit Gifft vergeben/ vnd jhn biß inn tod verfolget/ vnd sich mit nichten weisen lassen wöllen/ sonder also halßstarrig auff jhrer Geigen bliben seind.

Zu dem solte er alle secreta naturæ dermassen beschriben haben/ daß sie mäniglichen offenbar worden weren/ wa bliben die medici? Was were jhr ansehen bej grossen Potentaten/ Fürsten/ vnd Herrn? so eyn jeder idiota so wol als eyn medicus mit den heymligkeyten der Natur wüßte vmb zugehn? daß sie aber auch zu vnsern zeiten den medicis in gemeyn nit bekannt seind/ ist nit wunder/ dann sie halten sich eben wie jhre Vorfahren. Etlich verachten die warheyt/ die andern seind zu präch- [sig. ):(8r] tig/ die tritten zu Geitzig/ die Faulen wöllen nit/ mögen die Händ in Kolen nit schwartz machen: Welche aber begird darzu haben/ vnnd beschämen sich nit zu lehrnen/ so sie suchen vnnd beharren/ werden sie von dem der die Warheyt/ vnd das Liecht ist/ von der Finsterniß vnnd Menschen gedichten bald erlößt werden.

Dann solche hohe Gaben werden nit eym jedem von Gott gegeben. Da Christus zu dem Volck in gleichnissen redet/ vnd jhn seine Jünger vmb deren verstand fragten/ sagt er zu jhnen/ Euch ist gegeben das geheymniß des Reichs Gottes zuwissen/ denen aber draussen widerfährt es alles durch Gleichniß. Nuh begerte Christus nit al- [sig. ):(8v] leyn die Apostel/ sonder auch das arm Häuflin selig zumachen/ gleich wol verbarg er das Geheymniß vor den vndanckbaren Phariseern vnd Schrifftgelehrten/ vnd erklärt es alleyn den seinen. Es wissen alle Christen/ daß vnser Heyl vnnd Seligkeyt (welche mehr ist/ dann des Leibs gesundheyt) alleyn in Christo steht/ von welchem die gantze heylige Schrifft zeuget/ daß er das Liecht/ der Weg/ vnd die Warheyt sej/ vnnd ist aber die heylig Schrifft dermassen/ daß alle Ketzer jhre falsche meynung auß jhr gesogen/ vnd damit beschirmt haben/ Soll darumb der heylig Geyst deßhalben gelästert/ oder für eyn Ketzermaister gehalten werden? Wie reden die Propheten/ Johannes in Apocal[ipsin] [sig. A1r] vnd Paulus in seinen Episteln? haben nit alle Theologj damit gnug zuthun? Petrus sagt daß Paulus in seinen Brieuen etliche ding rede/ welche schwer zuuerstehn sein/ welche verwirren die vngelehrige vnnd leichtfertigen/ wie auch die andern Schrifften/ zu jhrem eygnen verdamniß. So nuh eyn Christ weder die Propheten/ noch Johannem/ oder Paulum/ darumb daß sie obscurè geschriben/ schelten kan/ oder soll/ warumb will man Theophrastum vermaledeien/ daß er seine arcana/ so der Seligkeyt nit zuuergleichen/ den Idioten vnnd vnwürdigen verborgen? Jst er doch nit der erste/ der solchen modum docendi geführt/ vil seind vor jhm gewesen/ die der Natur heymligkeyt also beschriben/ [sig. A1v] daß sie der Gemeyn biß auff dise stund verhalten worden/ welches also Gottes will gewesen ist. Vns fählets meins erachtens daran/ daß vns zuuil sein will die warhafftig Astronomiam vnd Philosophiam/ dardurch alles in der Natur offenbar wird/ zustudiern: Welches alles ich guter meynung die vnerfahrnen/ vnd auch die medicos hab wöllen erinnern/ damit sich eyn jeder darinn besser hab zu bedencken.

Souil dann dise Bücher belangt/ ist das Arguemnt aller treien auß der Jnscription klar gnug. Jn Archidoxis hab ich zwen Tittel funden/ so Theophrasatus selbst gemacht/ Jm eynen hat er 9. Bücher gesetzt/ im andern 10. Vnd im ersten Buch zeygt er selbs an/ wie das er [sig. A2r] dise Archidoxa in 10. Theyl theylen wöll/ zu eynem memorial für sein alter. Nuh finden sich aber nit mehr dann 8. Derhalben ettlich achten/ daß das Buch De Renouatione vnd Restauratione sej das ander/ De separatione Elementorum das tritt/ Dieweil er in libro 1. schreibe de mysterijs Microcosmi, so soll das de Renouatione Microcosmi/ als bald darauff volgen. Dargegen haltens andere pro libro nono, Jm sej wie im wölle/ so hab ichs für das neund Buch gesetzt/ will eym jeden hierinn sein vrtheil frej lassen. Vnd wiewol Theophrastus sagt er wöll das 10. Buch vngeschriben lassen/ So schreibt er doch am selben orth/ das den seinen gnug verstanden werd. Nach dem er dann in libri de vita longa den vsum [sig. A2v] anzeygt/ wie man das lang leben soll erhalten/ so acht ichs mit andern für das 10. Buch/ welches den Idioten wol verborgen bleiben wird/ dieweil er will das es jhnen nit offenbar sein soll. Jn disen Büchern Archidoxorum lehrt er die warhafftig/ vnd eynig Artznej/ dauon er in vilen orten meldung thut. Dann ob wol vilerley Artznej vns von Gott beschaffen/ so sollen doch/ wie Theophrastus sagt/ die Artzt wissen/ daß nit mehr dann eyn Artznej ist/ in deren alle Anatomi stehnd/ aller kranckheyten/ vnd aller Artzneien/ welche Artzne das höchst ist in allen dingen. Deßgleichen thut er auch in Tinctura Physicorum/ welche ich auß der vrsachen zu den Archidoxis hab lassen trucken/ dieweil dise Tinctura Phy- [sig. A3r] sica, wie er schreibt/ eyn vniuersal ist/ daß da als eyn vnsichtbar Fewer verzehrt alle Kranckheyten/ wie sie jmmer mögen genannt werden/ deren Dosis gar klein/ aber die würckung mächtig groß. Nuh setzt Theophrastus zwen nutz Tincturæ Physicorum, eynen auff die transmutationem metallorum, welche ich in jhrem werth laß bleiben. Den andern auff die Renouationem corporis, welcher zu forderst von den medicis soll bedacht werden/ deren fürnemen alleyn sein soll/ nit Silber vnnd Gold/ sonder arcana zumachen/ vnnd dieselbige/ wie Theophrastus in Paragrano lehrt/ wider dir Kranckheyten zurichten/ dann sie sollen von der Alchimj nemen die rechten Simplicia, Magnalia, Arcana, Mysteria, Virtutes, Vires [sig. A3v] vnd was jhnen zu der heylung von nöthen/ damit sie das reyn vom vnreynen scheyden/ vnd haben eyn lautere/ reyne/ vnd gewisse Artznej/ die in jhr krafft am höchsten sej/ wie sie vns Gott der Herr geben hat. Darzu ist dem Artzt die Alchimj von nöthen/ darauß aller Artznej bereytung geht/ vnd ohn dise kunst wird weder medicus/ noch Apotecker/ nichts schaffen/ wie solches hell vnd klar im tritten Theyl Paragrani anzeygt wirdt.

Daß ich das Buch de occulta Philosophia zu letzt auch angehenckt hab/ ist die fürnemst vrsach/ das mäniglich sehen möge/ wie vngütlich Theophrasto geschicht von denen/ die jhn für eyn Nigromanticum auffschreien/ vnd nit wissen was die warhafftig [sig. A4r] Magia vnnd Magus sej/ das doch alle Philosophj vnnd medici wissen solten: Dieweil die gantze natura rerum dardurch erkannt/ vnd keyn zauberej damit getriben wirt. Dann die trej Weisen im newen Testament seind nit Zauberer/ sonder die höchsten Philosophj gewesen/ so dazumahgl funden worden/ Also ist auch Theophrastus gewesen/ nit eyn Nigromanticus/ sonder eyn Magus naturalis. Jn disen Büchlin wird man finden was er von solchen sachen gehalten/ das mögen die aduersarij lesen/ vnd vrtheylen/ Ob er nit mehr mit Gott dann mit dem Teuffel/ wie sie sagen/ vmbgangen.

Nach dem aber ich dises hocherfahrnen vnd berühmtesten Philosophj vnd medici/ so Germania je ge- [sig. A4v] habt Philippi Theophrasti Paracelsi Arcana vnnd secreta/ so er in disen Büchern beschriben/ offentlich im Truck außgehen lassen wöllen/ So hab ich dieselbige niemand andern/ dann E[uer] Röm[ischen] Keys[erlichen] Mai[estät] als dem Haubt des H[eiligen] R[ömischen] Reichs zuschreiben vnd dediciern sollen. Nit alleyn darumb/ das E[uer] R[ömische] Key[serliche] M[ajestä]t dise Bücher in gnädigsten schutz vnnd schirm wider dir Theophrastomastigas auffnemen wöllen/ sonder vilmehr das E[uer] R[ömische] Key[serliche] M[ajestä]t samt andern grossen Fürsten vnd Herrn/ von der Lehr Theophrasti bessern Bericht empfahen mögen.

Dann wa sein Lehr falsch were/ wie sie von etlichen auß geschrien wird/ warumb solten nit billich alle Fürsten vnd Herrn dieselbig verfol- [sig. A5r] gen helffen? So sie aber (wie auß seinen Schrifften mit der warheyt wird bewisen) von Gott dem Allmächtigen vnserm Vatterland zugut/ auß sondern gnaden geben ist/ können alle grosse Herrn ohn jhren mercklichen schaden vnd nachtheyl nit vnterlassen/ die sachen dahin zurichten/ daß alles das/ was Theoprhastus hinder jhm gelassen/ recht erkannt/ ins Werck gericht/ vnnd probiert werde. Wie grossen fleiß haben Fürsten vnd Herrn/ das sie frid vnd ruh daheymen haben/ vnd jhr Land vnd Leuth vor den Feinden beschirmen/ darzu sie die besten leuth so man haben kan/ in Bestallung bringen. Dieweil sie dann vil grosser feind haben/ welche jhnen nach Leib vnd Leben/ vnnd aller gesund- [sig. A5v] heyt stellen/ nit minder als andern leuthen. Als da ist Quartana, Hydrops, Caducus, Lepra, Apoplexia, Lupus, Cancer, Fistula, vnd dergleichen. So solten billich alle Potentaten auch in erwehlung der Artznej/ nit minder fleiß anwenden/ damit wider oberzehlte Kranckheyten/ rath vnd hülff gefunden wurde/ welche bej Galeno vnd seins gleichen/ vergebens bißher gesucht ist worden. So nuh Theophrastus von disen allen gnugsam geschriben/ würden die grossen Herrn bej Arm vnnd Reichen ewigs lob vnd danck verdienen/ wann sie jhnen dise sachen mit ernst angelegen sein liessen/ das sie auch thon würden/ wan sie bedächten/ daß sie eben so wol in schwere kranckheyten fallen/ vnnd gleich [sig. A6r] dem tod vnderworffen seind/ als die ärmsten auff Erden.

Zu disen sachen aber will sich gebürn/ daß man nit alleyn gelehrte/ vnnd in der arbeyt erfahrne leuthe nemme/ sonder auch die auffrecht/ fromm/ vnd redlich seien/ nit jnen selbs/ sonder der Gemeyn Gottes nutz sein/ vnd den Armen so wol als den Reichen zudienen begern. Durch solche Leuth möchte durch fleißige arbeyt/ mit Gottes segen/ die Kunst der Alten (damit sie jhr leben auff lange zeit vnd jar gesund erhalten) so vns durch Theophrastum geoffenbart/ ins Werck gericht/ vnd den armen Krancken damit geholffen werden.

Vnd dieweil E[ure] Rö[mische] Key[serliche] M[ajestä]t von dem hochlöblichen Hauß Oe- [sig. A6v] sterreich/ die lieb vnd miltigkeyt gegen allen guten Künsten/ sammt andern hohen Fürstlichen Tugenden anererbt/ vnd dieselbigen bißher nit minder/ dann der fridliebend vnd großmöchtigst Römische Keyser Ferdinandus/ hochlöblichster vnd Seliger gedächtniß/ gnädigst befürdert/ vnnd in hohen Ehren vnd Würden gehalten haben/ So wöllen E[ure] Rö[mische] Key[serliche] M[ajestä]t gesinnet sein/ auch Theophrasti Paracelsi Arcana, vnnd hohe gaben/ so jhm von Gott verlihen/ aller gnädigst zu erkennen/ vnd jhn von seinen feinden nit lassen vndertruckt werden/ welche sich von jhme zulehrnen/ vnd jhre jrthumm/ darinn sie noch stecken/ fallen zulassen/ beschämen/ Oder aber sich der mühe nicht vndernemmen wöllen. [sig. A7r] Nichts bekommen wir ohn arbeyt/ nichts bleibt verborgen/ das wir mit fleiß ersuchen/ Darumb sich niemand abwenden lassen sol/ vmb der verborgnen red/ vnd wort willen/ So eym jeden dem es Gott gönnen wird/ zu seiner zeit geoffenbaret werden.#

Dieweil aber auch vnter den Galenischen vil guter Leuth seind/ welche die warheyt bekennen/ vnnd gern sehen/ das etwas bessers/ dann sie bißher gehabt7 an tag käme/ So ermahne ich alle die/ so sich Theophrastj rühmen/ daß sie nicht vmb Gelts/ pracht/ ehr vnd ruhm willen jhme anhangen/ vnd mit Sophisterej den Leuthen die augen füllen/ sonder mit allem fleiß dahin trachten/ daß sie in obgemelten Kranckheyten jhr kunst auffrichtig bewei- [sig. A7v] sen/ damit das Werck den Maister lob/ vnd das Liecht die Finsternuß vertreibe. Als dann wird alles das der warheyt zu wider ist/ selbs fallen/ vnd weichen müssen/ Wa aber dises nit geschicht/ werden die wort/ Schrifften/ schelten vnd verachten/ so wenig auff vnser seithen wircken/ als der Galenischen verfolgung biß her wider Theophrastum außgericht hat. Vnnd wie ich vor mehr gethon hab/ also ermahne ich abermahls beyde theyl/ daß sie die liebe bedencken/ welche Theophrastus in eym Artzet sonderlichen erfodert: Dann mit verfolgen werden wir zu beyden theylen nichts außrichten/ gleichwol wöllen die Galenischen bedencken/ ob sie schon vil Calumnias fürbringen/ werden sie dannocht wider [sig. A8r] die warheyt nichts vermögen/ sonder müssen dem Segen Gottes seinen fortgang haben lassen. Es ist vns aber gleich wie den Jügen/ die sahen die werck Christi vnsers lieben Herrn/ noch war der neid/ vnd haß so groß/ daß sie Christum/ das Liecht der Welt verwarffen/ vnd liebten die Finsterniß biß jhn die straff auff den halß kame/ Gott geb das vns dergleichen nit auch widerfahre/ dieweil wir Gottes willen widerstreben. Dann dises kan ich allhie auch zumelden nit vnderlassen/ dz Gott der Herr bei etlichen frommen leuthen/ sein gnad reichlich sehen lassen/ welche mehr außgericht/ dann dise thuen/ so bißher wider Theophrastum sich gesetzt haben.

[sig. A8v] Der Allmächtig gütig Gott verleihe E[uer] Rö[mischen] K[eyserliche] M[ajestä]t langwirige Gsundheyt/ Gnad/ Weißheyt/ vnd Verstand/ daß sie frid/ ruh/ vnd eynigkeyt im heyligen Röm[ischen] Reich/ zu dem Lob Gottes/ vnd der armen Christen nutz vnd heyl gnädigst befürdern/ anrichten vnnd erhalten möge.   Geben zu Straßburg den 28. Januarij 1570.

E[uer] Rö[mischen] Key[serlichen] M[ajestä]t

vnderthänigster

Michael Toxites, medicus Argentoratensis.