Text.Harvet.1602-01.A2r/Text
[sig. A2r] Ne faisons plus d’estat de l’ordre de Nature,
Mesprisons les moyens pour la vie ordonnez,
S’il est vray que les corps sujets à nourriture,
Puissent forcer les loix ou ils sont destinez.
Mais tenons nous au vray viuons en l’ordonnance,
Dont la proportion nous maintient ici bas:
Et pour entretenir nostre humaine substance,
Auec sobrieté seruons nous de repas.
C’est raison sans raison de penser raisonnable,
[sig. A2v] Ce qui contre raison s’oppose à la raison,
De vouloir soustenir ce qui n’est point probable,
Comparant ce qui est nul en comparaison.
Est ce pas dire en vain des pensees friuoles
Quand ce qui tousiours est se demonstre autrement?
De viure sans manger s’est viure de paroles,
Car tout corps naturel requiert quelque aliment.
Or braues champions combatez à oultrance,
Releuant vos espris sur la perfection,
Se serez vous bien tost abatus de puissance
Si vous ne receuez quelque refection.
