Text.Crollius.1609-01.!3r/Text

[sig. ()3r] Pavli Melissi Franci, Comitis Pal[atini] et Eqv[itis] Avr[ei] Civis Romani Ode alcaica ad Osvaldvm Crollivm, Medicum excellentiß[imum].

Plures per anno Galliam & Ausonas
Crolli perágras, discere fervidus
Artes honestas, exterasques
Insimul ore rotundiori
Sonare voces, quæque Macháonum
Requirit usus laude celebrium
Callere, non ex more vulgi,
Aut leviter sale sive lymphâ,
Fictæve tincti corticis unuine:
Sed ex professo scripta veterrima
Grajûm Latinorumque ad unguem
Noscere, & egregium quid ultra
Tuopte Marte extrudere. Vividum
Natura nescit acrior impetum
[sig. ()3v] Celare, nec præstantiores
Igniculos cohibet supultos
In corde Pallas. Novimus, in quibus
Versere flammis, eliciens aquas
Membris salutares viétis,
Balsameosque creans odores,
Et quicquid ægris expedit artubus.
Plus una prodest gutta tuæ (scio)
Stillationis, quamdè tota
Vtra medentum aliorum & ollæ.
Quin una saltem plus pilula efficit
Pusilla, quàm vel septem aliæ aut novem
Maiore compactæ pugillo,
Ventriculo minus utiles, nec
Tam profuturas. Fallor, an inclitos
Quos aula honorat splendida Cæsaris,
Sollerter æquabis Galenos,
Hippocratemque Menecratemque,
Et ÆsculapI numen, & obviis
Quicumque morbos tollere pharmacis
Norunt, & optatum medelâ
Pæoniâ dare sanitatem?
Experte raras Mulciberis face
Inventiones ac medicamina,
Divine Crolli, confer unum
Cuncta reperta breve in volumen,
[sig. ()4r] Vt his fruantur, qui studii flagrant
Amore talis. Pro meritis quibus,
Iidem precabuntur, perennes
Incolumis maneas in annos,
Addens repertis plurima commoda,
Queis longiorem corporibus diem
Donec, amicorumque vitam
Nestoreum revoces ad ævum.