Raphael Egli to Maurice, Landgrave of Hesse-Kassel; 1616, February 04
| Author: | Raphael Egli | |
| Recipient: | Maurice, Landgrave of Hesse-Kassel | |
| Date: | 1616, February 4 | |
| Place: | ||
| Language: |
| Editor: | Edited by Julian Paulus |
| Source: | Kassel, University Library, 2° Ms. chem. 19[1, f. 53-54 (olim 49-50) |
| Quote as: | https://www.theatrum-paracelsicum.com/index.php?curid=7442 |
Edition
[f. 53r] Illustrissime Princeps, Domine longè Clementissime, in luctu Illustrissimae Principis ac Sororis [Sophie von Hessen, 1571-1616], à cujus facie Dominus Jesus abstersit omnem lacrymam, non dubito eundem demitigaturum omnem Illustrissimae Excelsitatis Vestrae ex ejus obitu conceptum moerorem, cui me subjecto parentare carmine pietas jubet, his incluso literis. Caeterum Illustriss[im]ae Exc[elsita]tis V[estr]ae tum ad Tinctorem Gallum, tum ad filium meum Joannem Hulricum, ut ex Eadem intellexi Rauschenbergae, datae literae, nequaquam pervenerunt. Is postquàm trimestre Amstelrodami egit, tandem deficientibus nummis, & angore animi compulsus, contendit Bremam, ut certius aliquid ex me rescire posset, cum Tinctore ita pciscens, ut si Responsum acciperet ab Ill[ustrissim]ae Exc[elsita]tis V[estr]ae mens esset, quidque Eadem Rauschenbergae mihi essen loquuta. Ita ad Tinctorem eadem perscripsit Amstelrodamum, qui sine Ill[ustrissim]ae Exc[elsi]tatis V[estr]ae habitis expressis literis, negat se venire posse, uti Joannes Mercator Cheirurgus vir solertissimus pientissimusque in suis ad Filium hîc inclusis renunciat, significans Tinctorem per Joannes Koch Bremensem ad Ill[ustrissim]am Exc[elsita]tem V[estr]am ipsummet denuo scripsisse. Omnino igitur opus foret iterari literas ab Ill[ustrissim]a Exc[elsita]te V[estr]a prius mandatas, & si ita videatur, hûc ad nos mitti, quò certius perferantur Amstelrodamum. Intellexi verò ex fide dignis duobus, aliquos consiliarios abhorrere ab hoc instituto, qui si nossent quantopere demortuus Illustrissimus Wirtenbergicus idem Hamburgi magnis frustra quaesierit sumptibus, ut in suam ditionem importaret, profectò rem tanti momenti à Tinctore Gallo fideliter praestandam minus aspernarentur. Meus filius, praeterquam quod necessitate coactus, laceris & attritis pestibus, Bremâ cum Cursore Hamburgensi à quo necesse habuit decem mutuari imperiales, ut dissolveret hospitem & viaticum haberet, durtissimo tempore nocte diuque ad me contendit, laesis pedibus, ex superiore morbo & novo defluxu contraxit alterius ocularum vitium, subnata pupillae pelliculâ, ita ut Doctoris Petraei jam per plures dies utatur operâ atque cura: aliâ Ill[ustrissim]ae Excelsitati V[estr]ae [f. 53v] seipsum humilime stitisset, quod quandocunque jussus faciet, ne quidam sycophantae nobis propterea insultent, ut satis ex Doctore Goclenio intellexi, qui me monuit, ut ad Ill[ustrissim]am Exc[elsita]tem V[estr]am de integro perscriberem omnia; quod Eadem in optimam Clementer interpretetur partem, humiliter rogo atque oro, meumque filium pariter & me patiatur Sibi esse commendatos. Nuptiae filiae meae in Gailsheim feliciter Deo sit laus, 9. Jan[uarii] fuerunt peractae, quo cum uxore & filio Heinrico me contidi conducta Rheda. In reditu magnam difficultatem transeundi Rhenum sumus experti, Moeno jam clauso: sed tamen 15. Janurarij superatis omnibus, Marpurgum pervenimus salvi & incolumen, Dei beneficio. Meus etiam gener Josephus Le Pippre Doctor Medicinae meam filiam munificè habuit, pro ducentis, quos primserat in Dotem (Morgengab) quingentos deposuit, addito torque aureo. Adfuit & Hunoldus Inspector nunc Comitatus Kirchbergensis cum conjuge. Praetor huius loci Ill[ustrissim]ae Exc[elsita]ti V[estr]ae notus mei generi affinis quicum habitat, Eandem humilimè salutat, multis in nos collatis officijs & beneficiis. Joannes Wilhelmus Schefferus Pugil Marpurgensis se stitit sacrae Synaxi in die natali Domini cum mea filia: quod Ill[ustrissim]am Exc[elsita]tem V[estr]am ab illo requisivisse memoriâ teneo. Mitto hûc, quae postremis meis promisi Basiliana arcana, quae utinam Ill[ustrissim]ae Exc[elsita]ti V[estr]ae non sint ingrata. Addita est interpretatio mea novissimae Tincturae Mineralis Basilianae. Caeterum non debeo celare Ill[ustrissim]am Exc[elsita]tem V[estr]am quod particulare jllud, de quo frustra Aulaeander gloriatus est, neque habere posuit, neque unquam habiturs est, licet ad Ill[ustrissim]am Exc[elsita]tem V[estr]am Hemerario ausu scripserit, filius meus nactus est, viditque aurum inde arte productum: Sed inopia nos hîc illud elaborare non patitur. Sumitur una pars auri & solvitur in aqua Regis & cum Mercurio vivo, quantum ad Amalgama sufficit, praecipitatur, [f. 54r] deinde, effusâ aquâ Regiâ, affunditur oleum Vitrioli Veneris rubrum, quod paratur ex Viridi aeris extracto Vitriolo ipsius cum aceto distillato. Quater imbibitur sive imbuitur, & digeritur per biduum ac indidem abstrahitur per distillationem. Secundo loco solvuntur duae partes Lunae in aqua forti, & praecipitaritur cum sale tartari, postea effusâ aquâ per inclinationem Luna edulcoratur & cum oleo albo vitrioli ex Cupro sive viridi aeris parato, itidem quater imbuitur digeritur & abstrahitur ut supra. Deumum siccatae calces Solis & Lunae permiscentur, [ ]erum imbuuntur oleo vitrolo rubro quater ac per biduum d[ ]runtur antequam abstrahatur oleum. His peractis fulminantur omnia cum plumbo, & in quartatione habentur quatuor lotones auri puri ex Marca argenti praeter aurum initio abditum. Lunae decedunt in Marca Cotones duo non plures: decaetero subinde pergitur cum facto auro & residuo argenti, ut antea. Filius non dubitat quidquam de rei sibi visa & communicatae veritate: licet ipse propria nondum elaborârit manu. Lucrum praestant tres auri lotones, quarto pro sumptibus computato singulis quatuor decim diebus: quod utinam illi vel apud me, vel alibi elaborare contingent: Ill[ustrissim]ae quidem Exc[elsita]ti V[estr]ae tanquam debitum humilimè per me oblatum voluit; Quam divinae Protectioni cum tota inclyta Domo ardenter Deo commendamus, omnem Eidem ab eodem apprecati felicitatem. Datum Marpurgi 4. Februarij, 1616.
Ill[ustrissim]ae Exc[elsita]tis V[estr]ae humilimi servi
Raphael & Joannes HulDricus Jconij Pater & filius.
[f. 54v] Illustrissimo, Potentissimoque Imperij Principi, ac Domino, D[omi]n[o] Mauritio Hessiae Landtgravio, Comiti in Cazenelnbogen, Diez, Zigenhan, & Nidda, &c. Domino meo longè Clementissimo, ad proprias manus. Cito!
