Raphael Egli to Maurice, Landgrave of Hesse-Kassel; 1611, October 03
| Author: | Raphael Egli | |
| Recipient: | Maurice, Landgrave of Hesse-Kassel | |
| Date: | 1611, October 3 | |
| Place: | Frankenberg |
|
| Pages: | 2 | |
| Language: | Latin |
| Editor: | Edited by Julian Paulus |
| Source: | Kassel, University Library, 2° Ms. chem. 19[1, f. 60-61 (olim 55-56) |
| Quote as: | https://www.theatrum-paracelsicum.com/index.php?curid=7506 |
| Names: | Roosbachius |
| Places: | Marburg; Frankenberg |
Edition
[f. 60r] Gratia & Pax à Domino Coeli, &c.
Illustrissime & Potentissime Princeps, Domine Clementissime, non dubitavi recentem hunc Tractatum ad Ill[ustrissim]am C[elsitudin]em V[estr]am per Roosbachium studiosum Hannoviâ modò advenientem, rectà mittere, in quo mentio est facta tum veni & explorati, tum perampli cujusdam Particularis, quo aequales portiones auri & argenti simul conflatae in parum putum aurum, spatio unius hebdomadae, converti possunt beneficio massae cujusdam rubentis, menstruo antè praeparatae tempore. Ejus generis misit ad me amicus certus hisce nundinis libram sub fide silentij & paulò amplius: unde specimen ipse jam feci, sed in parva dosi (nec enim tenuitas mea nunc aliter tulit) nempe impenso uno ducato Ungarico, & tantundem argenti depurati. Enascitur autem, ex opere primùm aurum album, quale Ill[ustrissim]ae C[elsitudin]i V[estr]ae in hac schada pondere semidrachmae ideò oculis subjicio, ut si jubeat eam cum tribus partibus argenti liquari, & in aqua forti secerni, totam videat subsidere spadici colore, quae fusa quàm mox erit aurum obrizum tota, characterum viginti quatuor. Quod si mihi hîc ab Ill[ustrissim]a C[elsitudin]e V[estr]a dimidiam auri puri Marcam (qui sunt 32 ducati circiter) cum duabus Marcis argenti puri (ascendit autem ea summa tota non ultra taleros sexaginta quatuor Hispanicos, quibus & aurum & argentum comparari potest exquisitum) humilimè supplicanti impetrare liceat, ut progressu totum converti à me possit in aurum, idque in quantitate majore equidem post ternas hebdomadas, vel ad summum quaternas, totum quod accepero, fideliter restituam, hoc est, vel argentum cum auro (nihil enim deperit) si opus in majore fortè quantitate non procedert (quod tamen nullus dubito) vel tantum puri refundam auri, quantum binae argenti marcae, & dimidia auri valent, atque ponderant. Hac quidem ratione Ill[ustrissim]a C[elsitud]o V[estr]a non parum meis meorumque consultum ibit usibus, quippe ad quos supra sesquialteram Marcam auri inde redibit, defalcatis sumptibus, & copiam praeterea mihi praebebit procedendi ulterius, cùm primùm plus massae rubentis ab amico nactus fuero. Promisit enim se materiae tanum praeparatae ad me missarum, quantum in singulos menses integrae argenti massae in aurum convertendae possit esse saits. Caeterùm porcessum ideò promittere nequit, quòd vinculo juramenti sit obstricuts, & in aliena potestate: Sed ex quonoam fonte res proficiscatur ipse agnosco equidem, verum tota praeparandi ratio caeca est, nisi multiplici exploretur experientiâ. Ego verò toto jam biennio ab omni praxi chymica prorsus me abstinui, ut omnem semel apud Dominos collegas, variè in me affectos, & alios, suspicionem praeciderem: & Deum sincerè testor, non alia me esse mente in his rebus, atque in Tractatulo, quem Ill[ustrissim]ae C[elsitudin]is V[estr]ae judicio humilimè subijcio, consecroque, sum professus. Per facilè Eadem dignoscet pro sua illa in rebus omnibus sapientia divina, quid distent aera lupinis, hoc est, quid cum Chymicorum Vulgarium choragio commune mihi sit, quid femotum. In quam sententiam plura non addo, nisi quòd Ill[ustrissim]am C[elsitudin]em V[estr]am supplex orem, ut Clementissimè mihi dignetur ignoscere, quòd cum Eâdem his de rebus, licet timidiusculè, verbum commutare ausim, quippe urgente sic necessitate, ut qui secundum Deum ad alium praeterea receptum, cui fidere tutò possim, habeam neminem, multorum multiplicem expertus fidem, ne dicam perfidiam. Vnum hoc summis precibus Ill[ustrissim]am C[elsitudin]em V[estr]am quaeso, ut haec sibi concredita dignetur habere soli, sic ut nec unde proficiscantur, nec cujusmodi sint praeterea conster mortalium ulli, cùm non solùm mea summi id referat, quem necesse esset inde affligi: sed quòd omnino ex majestate Ill[ustrissim]ae C[elsitudin]is V[estr]ae non sit, verbum de Chymicis mecum commutasse, sed potius de Propheticis Apocalypseos mysterijs: non quidem quòd aliorum, quantumvis lividorum, reformidem judicia, sed quòd una haec res fere obstet, quo [f. 60v] minus multa communicentur ijs, quibus maximè debebantur, uti testibus literis perspicuum reddere possum. Quod reliquum est consolabor me divina illa paraclesi & vice caelitus missa, qua Ill[ustrissim]a C[elsitud]o V[estr]a novissimè Marpurgi suae beneficentissimae liberalitatis fonte me perfundens, Clementissimè est usa, nempe si caelum Marpurgense minus mihi constellatum sit futurum, habere Eam loca plurima, in quibus Eidem usui esse possim. Quod utinam nunc potius, dum Francobergae hîc cessamus (quanquam in officio hactenus etiam hoc loco non absorpui, sed binas disputationes excusas & excussas dedi, cum Aphorismis gravissimi momenti, quae omnia nunc alieno loco & tempore non mitto) fieri posset, donec propitio Domino Deo iterum Marpurgensibus restituemur moenijs; Spero enim in Domino non solùm id brevi fore, sed si officium fecero; etiam fore, ut brevi revirescere possim denuò, vitam illi amico meo non vili genere nato, meique sincerè amante, vitam prorogante Deo opt[imo] max[imo] dummodò Ill[ustrissim]a C[elsitud]o V[estr]a (quod etiam atque etiam demissè emsissimoque imploro) ne gravetur tantum auri & argenti meis filijs elaborandum per me concredere, quantum jaciendo huic operi fundamento erit satis: id quod non secus ac si ab Ill[ustrissime]a C[elsitudin]e V[estr]a tulissem muneri, licet fideliter redditurus, gratis animis reputabimus. Dominus Jesus Ill[ustrissim]am C[elsitudin]em V[estr]am cum tota inclyta Domo ad multos annos conservet incolumen. Francobergae 3. die octob[ris] 1611.
Illustrissimae Celsitudini Vestrae obedientissimus & devinctissimus servus,
Raphael Eglino-Iconius, S.S. Theologiae professor.
[f. 61v] Illustrissimo, Potentissimoque Principi ac Domino, D[omi]n[o] Mauritio, Hassiae Landgravio &c. Comiti in Cazenelnbogen, Diez, Zigenhain, & Nidda, &c. Domino meo longè Clementissimo, immediaté ad manus proprias.
