Poem, 1553, H.L.L. to Achatius Morbach

Author:	H.L.L.
Recipient:	Achatius Morbach
Type:	Poem
Date:
Pages:	1
Language:	Latin

Quote as:

https://www.theatrum-paracelsicum.com/index.php?curid=1133

Editor:	Edited by Julian Paulus
Source:	Paracelsus, Labyrinthus medicorum errantium, ed. Achatius Morbach, Nürnberg 1553, sig. A1r [BP030]

Back to Paratexts Back to Texts by H.L.L.

In lavdem medicinæ.

H. L. L.

Indidit humanis præclaras mentibus artes.
Clara gubernator qui regit astra Deus.
Vt certis totum moderentur legibus orbem,
Atque homines firma conditione iuuent.
Plurima uel referant præsentis commodo uitæ,
Nec non ut prosint moribus usq́ue bonis.
Præ reliquis diuina tamen Medicina putanda est,
Quæ morbis certum dat ratione modum.
Munere de cœlo missa est diuinitus orbi,
Hanc authore Deo credimus esse datam.
Namque opibus ueluti corpus præstare uidetur,
Sic alias artes uincere sola potest.
Esse quid utilius, uel quid præstantius unquam,
Humano generi quàm Medicina queat?
Hæc docet occultas rerum cognoscere causas,
Ægri, quo medica restituantur ope.
Conseruat sano solidas in corpore uires,
Nec tamen amissas non reparare potest.
Præscribit iusto conuictus ordine leges,
Qui prodesse solent, qui uel obesse cibi.
In pretio magnis erat undique regibus olim,
Qui Medicis etiam præmia magna dabant.
Ergo pij ut doctis Medicis tribuantur honores,
Biblia sacra Deo sic statuente iubent.
Nec te iudicij moueat sententia praui,
Sensaque inhumanis horridiora Getis.
Sed magis inde Deo toto dic pectore grates,
Qui medica morbis eripit arte suos.