Coler 1609 Calendarium
Bibliography
M. Johannis Coleri Aureo-Montani Silesij Calendrium perpetuum et Sex Libri Oeconomici De Re Familiari, Hortensi, Rustica, Pecuaria, Venatoria, & Medicamentaria. Das ist/ EJn stetswerender Calender/ Auch Sechs Nothwendige vnd gantz nützliche Haussbücher/ Vor allerley Kauff vnd Handelsleute/ [...] Jetzo Auffs New mit sonderbarem hohen fleiss vom Authore selbst vbersehen/ vnd vermehret [...]. Wittenberg: Lorentz Seuberlich für Paul Helwigs 1609, pp. 779-780
Text
[p. 779]
Das CXXXIX. Capittel.
Von den rechten wahren Praeparationibus Chymicis.
Ich wil hier den filijs artis nur etliche Praeparationes medicamentorum Chymicorum anzeigen/ worauff sie dencken/ vnd denen sie nachtrachten sollen in jren peregrinationibus, das sie dieselbigen bey den rechten Chymisten suchen/ jnen auffschreiben/ vnd dieselbige machen lernen. Handgrieffe vnd regierung des Fewers mus man wissen/ sosnten ists nichts/ man rühme sich gleich der Chymia, so hoch man wil oder kan: vnd wenn du etwas gelernet vnd erfahren hast/ so stecks nicht einem jedern in seinen Hals (quia artes illae nun sunt omnibus vagabundis nebulonibus & erronibus ita prostituendae, quemadmodum quidam faciunt) sondern folgen dem Exempel Iohan. Montani, des fürtrefflichen Philosophi nach/ der mit seinen steten vbungen/ handgriffen vnd nachsuchungen der geheimnissen aller vegetabilien, mineralien vnd animalien, mit seiner philosophia mechtig hoch gestiegen/ vnd in ein gros alter kommen ist: Dieser Montanus helt seine ding/ die er durch stettige vbung erlanget/ in grosser geheim: Vnd weil ein grosser zulauff von allen orten der Welt/ vnd auff allen strassen zum jhm war/ vnd ein jeglicher was sonderliches von jhm fassen vnd begreiffen wolt{/} so sagt er zu denselbigen/ lieben gesellen/ kunst vmb kunst/ stück vmb stück: Fieng darnach an mit jhnen zu conferiren/ vnd forschet/ was sie kundten/ ob sie einen Mercurium Solis, Lunae, Flores oder Vitrum Antimonij machen/ einen Metall, einen Sulphur, Sal, oder Mercurium extrahiren köndten/ oder was er sonsten gerne hette wissen wollen. Wenn er nu etwas erfuhr/ so must ers jm bald weisen/ so bekam er mannich gut kunststück/ darnach er sonst weit vnd ferne hette reisen müssen. Aber also bekam er manch kunststücklein/ vnd durffte nicht weit darnach rennen vnd lauffen/ ob er wol dem Theophrasto bis in Egypten hinein/ vnd hernach aus Egypten wider heraus bis gen Saltzburg nachgezogen war/ den er auch dar angetroffen/ aber/ da er schon todt vnd begraben gewesen. ist aber gleich-
[p. 780]
wol auff seinem Bette darinnen er gestorben/ gesessen: Vnd wenn er also etwas bekam/ so lehret er jhn wider ein lustig kunststücklein. Denn vor watt/ gehöret wider watt/ sagt der Pommer/ Märcker vnd Meckelbürger/ wer lieb haben wil/ der must lieb lassen/ da ward nichts anders aus. Darnach so weise keinem deine Kunstbücher/ las auch niemand in dein Studorium nicht komen/ las es auch niemand wissen/ wo deine kunstbücher sein. Denn (experto crede Ruperto) die Buben haben eines theils keine gewissen/ haben eine krumme hand/ stelen wie die Diebe vnd Raben{/} wie mir auch widerfaren/ denn mir dis Jahr etliche herrliche Kunstbüchern von solchen losen Landleuffern gestolen sein/ die ich jnnerhalb 20. Jahr vnd lenger/ mit grosser mühe vnd arbeit Täglichen vnd nächtlichen geschrieben/ ja auch mit grossen vnkosten bekommen vnd ausgeschrieben/ die ich vmb viel Geld bahr gerne wider lösen wolt/ wenn ich sie wider bekommen möchte: Sed transeant haec cum caeteris erroribus.
