Dedication, 1564-07-28, Thomas Erastus to Hieronymus Fugger and Mathias Gerardus a Castelan
Author: | Thomas Erastus |
Recipients: | Hieronymus Fugger Mathias Gerardus a Castelan |
Type: | Dedication |
Date: | 28 July 1564 |
Place: | Heidelberg |
Pages: | 4 |
Language: | Latin |
Quote as: | https://www.theatrum-paracelsicum.com/index.php?curid=2752 |
Editor: | Edited by Julian Paulus |
Source: | Thomas Erastus, Ratio formandorum Syllogismorum breuissima & facilima, Basel: Johannes Oporinus 1565, p. 3-6 [BP.Erastus.1565-01]
|
Back to Paratexts Back to Texts by Thomas Erastus |
[p. 3] Illvstri et generoso viro, D[omino] Hieronymo Fvggero, Comiti in Vueissenhorn & Kirchberg, &c. & tum propria, tum maiorum uirtute nobilissimo uiro, D[omino] mathiae gerardo à Castelan Tyrolensi, Dominis suis obseruandis, Thomas Erastvs medicus S[alutem] D[icit].
Svperiore hyeme, cùm Schola nostra dißipata esset, professoresq́ue in diuersas partes abijssent, atque ego cùm Illustriß[imo] Principis consilio Mosbachiam seceßissem, scripta quædam mea, quæ diuersis temporibus de diuersißimis rebus ad diuersos amicos scripseram, cum aliud propter librorum penuriam (non enim licuit eos mecum asportare) aliaq́ue incommoda nihil facere possem, re- [p. 4] legi: & quæ utilia existimaui, ab inutilibus discreui. Inter alia in manus incidit scripti de formandis syllogismis exemplum: quod abiturus, uobis quoque repentè abituris, Bononiæ anno 1555, subitò & tumultuariè, spacio uidelicet minori quàm tridui, conscripseram. Quod cùm perlegissem, & nonnulla in eo correxissem, & aliquot præterea in locis auxissem, amicis quibusdam uiris doctis & pijs legendum & æstimandum dedi. Ii cùm utilitatem, si publicaretur, adolescentibus studiosis minimè contemnendam allaturum censerent, autores mihi fuerunt, ut in publicum exiere paterer. Horum consilium cùm non improbarem, non sub alio quàm uesto nomine, quibus ab initio scriptum destinatumq́ue fuisset, in publico apparere uolui. Accipite ergo hunc tenuem libellum, uestra causa scriptum, paulò nitidiorem & locupletiorem, ea humanitate patiamini. Si quis ex ipso fructus ad alios manabit, quem minimè uulgarem aut dubium illi, de quibus antea dicebam, spe- [p. 5] rant futurum: gratia uobis debebitur, qui mihi eius conscribendi autores præcipue, imò soli fuistis. Spero uos factum meum, & eorum qui ad id me impulerunt, consilium, non improbaturos.
Commodùm quoque accidit, ut superioribus diebus, egregiè doctus iuuenis, bonarum artium Magister, ac Mathematicarum disciplinarum professor, Symon Grynaevs, à me peteret, ut quod esse discrimen inter Dialecticam & Logicam putarem, ipsi scripto exponerem. Hoc ipsum præsenti libello de Syllogismorum constructione, annectere placuit, nonnullis de causis. Primùm, quia non dißimile argumentum contineret. Deinde, quia illa propemodum cuncta comprehenderet, quæ præsens uobis, si non dilucidius, certè copiosius exposui. Videbar etiam memoriæ uestræ consulturus. Quippe facilius, quæ à me ante tot annos audissetis, in mentem reuocaturi uidebamini, si iterum nunc eadem ferè legeretis. Postremò, arbitratus sum hanc rem plurimis alijs gratam fore, præsertim quum perpauci rectè obseruasse uidean- [p. 6] tur, quæ in eo disputantur.
Quòd si bonis & studiosis, quibus ista scribuntur, hæc qualiacunque prodesse aut placere sensero, de alijs edendis cognitabo, in quibus grauiores & obscuriores tum Philosophiæ tum Medicinæ quæstiones declarantur, & quæ plusculum in se habere eruditionis existimari fortasse possunt. Deus opt[imus] max[imus] consilia uestra fortunet: & ad sui nominis gloriam, multorumq́ salutem atque incolumitatem dirigat. Valete. Heidelbergæ, 5. Calend[is] Augusti, Anno Domini 1564.