KassUB 2chem19.1 210
| Author: | Christophorus Hornius |
| Recipient: | Moritz Landgraf von Hessen-Kassel |
| Date: | 1611 December 19 |
| Place: | no place |
| Pages: | 2 |
| Language: | Latin |
| Editor: | Edited by Julian Paulus |
| Source: | Kassel, UB, 2° Ms. chem. 19[1, f. 210—211 (alt f. 200—201) |
| Quote as: | https://www.theatrum-paracelsicum.com/index.php?curid=375 |
| Names: | n/a |
| Places: | n/a |
[f. 210r] S[alutem].
Illustrissime et clementissime princeps:
siquidem illus[trissimam] c[elsitudinem] v[estram] confici curavit pulverem ex auro medicum: nunc usus ipsius mihi erit ostendendus. Dosis illius est <granum> 1, aut <drachma> <semis>: in aquis destill[atis] fumariae, carduibenedicit, angelicae, acetosae, scabiosae: aut in jusculo gallinaceo &c.: medicamentum hoc solare, juxta usitatam medendi methodum usurpatum, vitalia cum primis membra corroborat; aperit obstructa, corrigit corrupta, expurgat (per sudorem) supervacua et maligna.
Pulvisculus iste per se quidem satis est tenuis, penetrabilis, efficax et quasi spiritualis: ut medicus absque ulla extractione eo tutissime et felicissime uti possit: extractionem tamen attentari (sed fortiori ignis calore) non improbaverim.
Color pulveris subrubicundus, instar coraliorum praeparatorum, exemtae omnis cruditatis metallaris et perfectae decoctionis nota est; imo corporis factam esse solutione & exaltationem arguit. Aurum vero hac ratione praeparatum, chemistam in corpus metallicum reducturum vix crediderim.
Hisce diebus mihi vel aliud agenti in mentem venit modus ille, quo primum deprehendi; in cornu cervino usto, sulphur mineralibus et metallicis corporibus valde familiare & sympatheticum delitescere: is sane facilimus est et manu commonstrandus. Cum v[ero] cornu monocerotis, ustum, eo modo examinatum, certissime idem sulphur praestantissimum, metallis sympatheticum in se contineat operae precium dubio procul facturus esset aliquis; si cum eodem unicornij cornu usto, ex auro pararet medicamentum solare, cardiacum & alexiterium.
Ad operationem in metallicis, hunc pulverem haud quicquam prfuturum puto: dann die edle tinctura metallorum kann nichts frembdes, auch nichts zerstörliches dulden vnd leiden: vnd gehöret gewißlich hierzu ein anders, sonderliches solutivum corporus solaris; welches zugleich dasselbe natürlich aufflöset vnd exaltiret: hoc aurum vere solutum & summe exaltatum, haec [f. 210v] salamandra rubicundissima, sine omni dubio est illud verum et sincerum auri semen; fomentum, fermentum, imo fundamentum operationum et graduationem chemisticarum in metallis inferioribus. Verum haec extra oleas: veniam, quaeso, illustr[issime] c[elsitudine] v[estra] clementissime det importunae & incivili meae prolixitati.
Unicum insuper (si illustr[issima] c[elsitudo] v[estra] grave non est) brevibus commendabo magnum naturae mysterium & singulare Dei donum: quod hactenus per annos complures, tum laboribus chymicis, tum praxi medica, satis compertum habeo: illum auri solarem & salutarem spiritum, balsamum vivificum & maxume alexiterium, etiam inferioribus metallis & mineralibus alijs, imo plurimis vegetalibus & animalibus inesse corporibus: idque singulari quodam artificio ad oculum demonstratur.
Hujus artificij adminiculo ut etiam praxi medica simul in medicamentorum praeparatione, liquido ostendi potest: quibus in partibus cujuslibet substantiae (sive mercurialibus & sulphureis, <id est> aqueis, aëreis atque aetherijs; sive terrenis & salitis) forma illa solaris, balsamica, vivifica, alexiteria praecipue delitescat: quod arcanum, in re medica summum, ac utilissimum vix attigisse aut indigitavisse videntur in suis scriptis, physiologi dogmatici & hermetici: de quo dialogum jam horis subcisivis meditor medicum: O thesarum naturae inexhaustum! Sed nimium illust[rissimam] c[elsitudinem] v[estram] scripto plus aequo verboso, molestus fui.
Felicissime in Christo vale, princeps serenissime, mihique & studijs meis face clementissime.
Dab[am] 19 decemb[bris] anno 1611.
Illustrissimae c[elsitudinis] v[estrae] subjectissimus & obedient[us]
Christophorus Hornius
