Preface, 1553, Achatius Morbach to the Reader
| Author: | Achatius Morbach |
| Recipient: | Reader |
| Type: | Preface |
| Date: | Expression error: Unrecognized word "no". |
| Pages: | 2 |
| Language: | Latin |
| Quote as: | https://www.theatrum-paracelsicum.com/index.php?curid=1675 |
| Editor: | Edited by Julian Paulus |
| Source: | Paracelsus, Labyrinthus medicorum errantium, ed. Achatius Morbach, Nürnberg 1553 [BP030]
|
| Back to Paratexts Back to Texts by Achatius Morbach |
[sig. A2r] Achativs Morbachvs medicinæ candidatvs, lectori foelicitatem &c.
Medicinam maxima in ueneratione semper fuisse, lector candidissime, adeo perspicuum est, ut neminem qui litteras legerit latere possit, Nam siue Hebræos siue Arabes secutus fuerit: seu Egyptios & Persas seu denique Græcos ac Latinos attigerit, eam semper aut diuinos homines, quos Heroas uacomus, aut pientissimos Theologos, aut magos religiosissimos, aut philosophos sapientissimos, aut etiam reges potentissimos tum coluisse, tum exercuisse inueniret, multosq́ue ex his & deos habitos: plurimos uero tantis honoribus effectos quantos homini impendere uix fas est. Verum nostro æuo (quod citra animi excandescentiam referre nequeo) in abiectissimorum ne dicam perditissimorum hominum tractationem deuenit, ut nemo tam rudis, tam ignauus, tam omnium rerum imperitus existat, qui sese ex professo medicum dicere non audeat. In illam nempe fecem hominum detrusa est medicina, ut non modo aliptæ & balneatores, pigmentarij, & pharmacopolæ, uerumetiam coci, cupediarij, circulatores, hystriones, & tota illa turba circumforaneorum medicinam exercere audeat, qui tamen omnes carnifices uerius quàm me- [sig. A2v] dici & dicendi & habendi sunt. Quod in primis hominum uitas negotiantur, questum magis quàm artem secuti, & dum mederi audent homines perdant, Hi sunt qui periculis nostris, ut ille ait, discunt, & per experimenta utas auferunt. Cuius temeritatis licentiam sola impunitas hactenus præstitit, cum nulla lex sit (ut Plinij uerbis utar) quæ inscitiam capitalem puniat. Ne tamen perpetuo & sine exemplo uindictæ hoc genus hominum elabatur, iuditium nuperrime cum Mulomedico peractum, sub specie Dialogi, proponere uolui, quem scilicet Dialogum sub calcem huius Labyrinthi reperies, in quo causa publica mortalium agitur, Inprimisq́ue temeritas ac maleuolentia istius sectæ ho[minu]m manifestis, argumentis, tum culpatur, tum reuicitur, demum quoque pro meritis uindicatur. Nemo autem existimet criminib[us] ab illis arreptis, ut medicinam artem omnium præclarssimam arrodere uelim, Sed quo Mulomedicos istos & infimæ plebis quisquilias, qui nec natare nec literas norunt, coargua, rapacesq́ue ipsorum nundinas subuertam, qui humanæ uitæ ad mortem usque insidiantur. Adesto ergo, lector candidiss[ime] animo æquiore ac communem humani generis iacturam, reique medicæ dedecus curiosius expende, Inuenies enimuero nulla pestem longius abigendam, quàm malum medicum qui dum uitam hominis aut tueri aut reparare promittit, necem interitumq́ue machinatur, ceu hoc Phoebea luce clarius ex instituta scæna cognoscere licebit. Tu modo fac spectatorem iucundum agas. Vale ac plaude.
