Difference between revisions of "Poem, no date (1608), Benedictus Figulus to Johann Baptista von Seebach (BP280)"

From Theatrum Paracelsicum
(No difference)

Revision as of 22:41, 22 February 2023

Author: Benedictus Figulus
Recipient: Johann Baptista von Seebach
Type: Dedication
Date: Expression error: Unrecognized word "no".
Place: Hagenau
Pages: 3
Language: Latin
Quote as: https://www.theatrum-paracelsicum.com/index.php?curid=813
Editor: Edited by Julian Paulus
Source: Thesaurinella Olympica aurea tripartita, ed. Benedictus Figulus, Frankfurt am Main: Wolfgang Richter für Nicolaus Stein 1608, p. 109—111 [BP280]
Back to Paratexts
Back to Texts by Benedictus Figulus

ELEGIA DEDICATORIA AD NOBILISS[imam] GRAVISS[imam] LITERATISSIMVM, ET SPAgyricae artis experimentissimum virum, Dominum Iohann[em] Baptistam à Seebach, &c. S[acrae] R[omanae] C[aesareae] M[aiestatis] D[ ] Rudolphi II. Imperatoris, &c. Dapiferum, &c. Dominum Fautorem, & Mecoenatem suum colendissimum.

Seehbachiae Stirpis Sidus ter Nobile, Iane
Baptista, ô Generis viua columna tui.
Accipe sincera munuscula mente profecta
Chemica, nunc offert quae Benedictus amans
Artis Secretae, Diuinae, Coelitus ortae,
Et Theophrasteae Cultor, in orbe, scholae,
Quae in te constantis nostri monimenta fauoris
Sint & contractae pignus amicitiae.
Hactenus Hesperiis sudastignauiter hortis
Impiger, extremo multa labore parans,
Plurima veracis documentaque saepius artis
Perspexti; Inuenta est crebra medela tibi.
Quisquis inexpertus Diuinam hanc proterit Artem
Spernit, contemnit, verè Anathema mihi. [p. 110]
Cedite fallaces, syrvpica tvrba, Magistri:
Nonne inter Medicos iam Theophrastus ouat
Solus Apollineos: Decus immortale manebit
Huius in orbe VIRI, fama, perennis Honos.
Omnia rumpantur licet inuida Corda, Magistri
Et Praeceptoris Enthea Scripta dabo.
Hunc omnes, omnes toto orbe sequantur oportet.
Buccina ἀληθείας nam Paracelsvs erat,
Quisquis contemnit Diuini scripta Magistri,
Ille ipsum spernit, qui regit astra, Deum,
Fautor Amice, modò breue post quid fiet, Elias
Quando Artista aderit, deinde Beatus Enoch,
De quibus Avreolvs noster praedixerat, illud
In scriptis repetit hinc & vbique suis.
Crede mihi praestò sunt, viuunt ambo: Malignus
Sentiet Orbis. Homo desere turpe nefas,
Et resipiscendo solum complectere Christvm,
Mendacis mundi putida scripta fuge, &c.
Dira flagella Devs demittet ab aethere summo,
Pestem, bella, famem, plura flagella necis.
Nam furor exrsit diuinis; Olympus & ipse
Praeparat incensus tela furore graui,
Peccatis variis immerso turpiter Orbi,
Pestiferae succo perlita tela luis.
O Patria infoelix! Quae te infoelicia fata
(Horresco referens) mille pericla manent.
Teutonia infoelix planè excaecata, Prophetas
Flaso quàm diu amas? hos neque nosse cupis?
Cum tamen expressis verbis descripserit ipse
Christvs, ab explicitis hosce cauere notis
Iusserit. O vecors immundi Insania Mundi!
Quae Christum lucem respuis atque fugis
Coelitus exortam: Deliramenta Sophorum
Ethnica sectando, certa venena tuae
Certò animae. Ah oculos nunc erige, respice Christum
Solum. Quae Mundi, gaudia vana fuge:
Sunt animae casses periturae: Desere Mundum
Sub stygias etenim praecipitaris aquas. [p. 111]
Post mille exhaustos casus, & mille labores,
Ætas quos nostra haec luxuriosa nimis
Sentiet; hinc tandem Saturnia Regna sequentur,
Constituet Regimen Christus in orbe Nouum.
Aurea succedet, lutulentaq́ue desinet Ætas,
Christi miraclis ingeniosa nouis.
Dulcia quàm nostram pertentant gaudia mentem,
Quando aderit nobis conspiciendus Enoch,
Ac indiuiduus Comes eius, Magnvs Elias,
Docturi gentes, quae sit ad astra, via.
Verùm extra metam ferè nostra Camoena vagata est,
Talia nec dices hoc referenda loco
Optime Seebachi, nostram tu fronte serena
Musam acceptabas, atque fauore tuo
Avgvstæ memet complectebaris amicè,
Insinuans animo Chemica plura meo.
Perge fauere meis conatibus, Inclute Fautor,
Officiis studium promoueasq́ue meum.
Immemorem facti me nulla redarguet hora,
Quamuis pauperies me premat vsque grauis.
Sim tuus ex animo: Penitis nam tute medullis
Totus inherescis, Magne Patrone, meis, &c.

T[uae] Nobilißimae Excellentiae Studiosißimus,

Benedictus Figulus, Vtenhouius, Francus, Poëta, Th[eologus] Th[eosophus] Ph[ilosophus] M[edicus] Eremita, &c.

Apparatus

Variants

Notes

Marginalia

Word Explanations

Sources

Corrections

Bibliography