Poem, no date (1608), Benedictus Figulus to Joachim Ernst, Markgraf von Brandenburg (BP280)

From Theatrum Paracelsicum
Author: Benedictus Figulus
Recipient: Joachim Ernst Markgraf von Brandenburg
Type: Dedication
Date: Expression error: Unrecognized word "no".
Place: Hagenau
Pages: 3
Language: Latin
Quote as: https://www.theatrum-paracelsicum.com/index.php?curid=814
Editor: Edited by Julian Paulus
Source: Thesaurinella Olympica aurea tripartita, ed. Benedictus Figulus, Frankfurt am Main: Wolfgang Richter für Nicolaus Stein 1608, p. 147—149 [BP280]
Back to Paratexts
Back to Texts by Benedictus Figulus

Proloqvivm dedicatorivm

ad

Illvstriss[Imvm] Principem Ac Dominvm, D[omi]n[vm] Ioachimvm Ernestvm, Marchionem Brandenbvrgensem, Borvssiae, Silesiae, Stetini, Pomeranae, Großiae, Cassubiorum ac Vandalorum Ducem, Burggrauium Norimbergensem, Principem Rugiae, &c. Dominum suum clementißimum.

Marchio, magnanima virtute, Decore refulgens
Heroo, Patrii Dux animose soli,
O Ioachime Erneste, audi, Illustrissime Princpes,
Brandenburgensis stella serena domus.
Septima fluxit Hyems, Septenaque voluitur aestas,
Dum miser à patriis exul oberro focis,
Fortunae innumeris iactatus adusque procellis
Hospes in ignota dum regione moror.
Vix mihi septenae luces transisse videntur,
Dum patienti animo quaeque sinistra tuli.
Sacra Poësis erat mihi cordi tempore quouis,
Haec alimenta mihi curta meisque dabat.
Mundus at immundus dum respuit omnia Sacra
Et sacris Musis denegat hospitium,
Auxiliatrices nobis dextrasque recusat
Heu nimis, ingratis, pectore & ore, modis.
Spem tamen abieci nullatenus. Ipse Iehova,
Me tegit inuitis hostibus, atque regit.
Huius nî verbum me sustentasset in arctis
Rebus, & hac misera conditione meos,
Et mihi solamen sine magna fruge dedisset;
Mersa fuisset aquis naufraga nostra ratis. [p. 148]
Iam dudum: Ast mitis spaciosi praeses Olympi
Hoc Patria auertit pro bonitate malum,
Gloria dum Christi solummodò quaeritur à me,
Non mea, sed Superi Gloria diua Patris.
Munere de cuius sperno contraria quaeuis,
Fallacis linguae liuida tela, minas.
Ergo Poësis vni mea cuiuis Sacra molesta est:
Quae sustentandi prodeat ansa mihi?
Mens quoque propediem nostris valedicere musis,
Non sine re suadet, dum grauis aura tonat.
Inuitante Deo, Medicas ad Apollinis artes.
Et Paracelsaeae transeo castra scholae.
Scilicet effluxis studium colui quod ab annis
Pluribus Hermeticis inuigilando libris.
Ecce metalliferos placuit mox visere montes,
Naturae abstrusum perdidicisse Chaos,
Et Tyrolanos tractus percurro, deinde
Styria visa mihi commoditasque loci,
Inde Carinthiacae superando Cacumina terrae
Vidi, propicio sic mediante Deo,
Felices sedes, loca ter felicia, Noster
In quibus optauit saepius esse locis,
Magnus Apollo Decus, Theophrastus, coelite Sancti
Numinis afflatus sidere, Tevtoniae.
In peregrinando dum colligo Scripta Sophorum
Plurima, sed Patriae, Dux Ioachime, meae,
De magni Lapidis Miraculo ter benedicti
Quo nullum toto maius in orbe Bonum.
Publica, filiolis doctrinae, ad commoda duxi
Participanda statim muneris esse mei.
Ex quibus in lucem dum profilit Hortulus almam
Noster hic Hermeticus, Marchio Magne faue.
Nominis Augusti exoptat viridante sub vmbra
Septimenta tui fida patrocinii
Tutelaeque tuae: Liuentia pectora in orbe
Plurima nam nobis impedimenta ferunt.
Chemica peruerso nam disciplina Venenum
Est Mundo: Spernit Coelica Dona Dei. [p. 149]
Magnum opus aggressus, Duce Christo ac auspice Christo
Ipse quod optatâ commoditate beet.
Nam Rediuiuus erit toto Theophrastvs in orbe,
Si modò subsidium, porrigat alma manus
Principis Heroi, mihi, nec conatibus obstet
Cum Mundi Satanas improbitate sua,
Hostis ἀληθείας, verae sapientiae alumnis
Pestiferae obtrudens somnia vana scholae.
Denuò sub praelum Theophrasti scripta dabuntur
Propria, cum limâ dexteriore tibi.
Thειologειa simul mox sub diuina sequetur,
(Mundo miraclum nempe futura Nouum,)
Flaminis aetherii diuinitus inspirata
Ductu elementi, Numinis atque Sacri,
Et remouebuntur Zizania, dummodò libris
Mixta fuêre male, Scripta aliena, Viri.
Fautor Apollineae quia sed tu Maximus artis
O Princeps, Patriae, Marchio Diui, Pater,
Et Theophrastaeam Medicinam pectore toto
Prosequeris, studium hoc dulce fauore pari:
Accipe clementi vultu tibi dona dicata;
Primitias genii Philosophantis habe.
Hesperidum aureolos aditum indubitanter in hortos
Menti auidae reserant quae Sacra Scripta Sophûm.
Imperium sic Iova tuum fortunet in annos
Complures, Patriae sis maneasque Pater, &c.

Vestrae Illustr[issimae] Celsit[udinis] Subiectißimus Cliens

Benedictus Figulus Vtenhouias Francus, Poeta L[aureatus] C[oronatus] Theologus, Theosophus, Philosophus, Medicus, Eremita, &c.