Dedication, no date (1603), Zacharias Palthenius to Kaiser Rudolf II.
| Author: | Zacharias Palthenius |
| Recipient: | Kaiser Rudolf II. |
| Type: | Dedication |
| Date: | Expression error: Unrecognized word "no". |
| Place: | Frankfurt am Main |
| Pages: | 4 |
| Language: | Latin |
| Quote as: | https://www.theatrum-paracelsicum.com/index.php?curid=792 |
| Editor: | Edited by Julian Paulus |
| Source: | Paracelsus, Operum medico-chimicorum sive paradoxorum tomus genuinus primus, Frankfurt am Main: Zacharias Palthenius 1603, f. ):(2r – ):(3v |
| Names: | Paracelsus; Karl V., Kaiser; Maximilian II., Kaiser; Adam von Bodenstein |
| Places: | Deutschland; Ungarn; Europa; Österreich; Steiermark; Kärnten |
| Back to Paratexts Back to Texts by Zacharias Palthenius |
Avgvstissimo, Potentissimo Inuictissimoque Romanorum Imperatori. Rodolphi Secvndo, Regi Vngariae et Bohemiae, Domino, Domino suo clementissimo, Salutem, Gratiam & Pacem.
Benigniore quidem & fauentiore sydere, Inuictissime Imperator, non poterant Nobilis & praeclari admodum Paracelsi genuina Opera, Latino per nostras Musas cothurno donata, epitomisque tum columnaribus, tum finalibus splendide culteque exornata, lucem iam iterum aspicere, quam sub Augustissimo Serenissimae Celsitudinis vestrae Patrocinio: neque debuerant vel auspicio feliciore, vel nobiliori priuilegio diuersas diuersorum hominum manus mentesque peruagari, quam sub fulgentissimo & praeclarissimo eiusdem Celsitudinis vestrae nomine: neque sciuerant accomodatiori arcano adituque & suum & simul meum desiderium significare, quam sub luculentissimo & Serenissimo Invictissimi titulo. Victoram siquidem non tam de maleuolorum & inuidorum ob- [f. ):(2v] trecationibus, verum etiam de temporis iniuria pro rerum mearum tutela, & pro necessariorum meorum exspectatione, Vestri, vt dixi, Augustissimi nominis, certo sibi pollicetur. Fausto ergo omnino omine, & con(silio non ineuidenti, quicquid huius est, arbitror, actum est.) Nam si Sereniss[imam] Celsitudinem Vestram inter tot Imperatores, quorum splendore haec nostra refulsit Germania, prae omnibus ad fidem, pietatem, magnanimitatem, liberalitatem, mansuetudinem, constantiam, & ad cuncta immortalitatis monimenta enumerem, hoc mihi cum multis est commune: si vero ad res bello, paceque praeclare gerendas ab ipso Deo ter Opt[imo] Max[imo] delectam referam: hoc mihi cum tota Germaniae & Pannoniae vtraque coniunctum omnino est. Verum quod ad rem publicam literariam, eiusque milites saluandos, tutandos, promouendos vnice Ser[enissima] vestra Celsitudo propendeat, hoc mihi cum ipsis tantum proprium & praecipuum esse intelligo. Testes, quotquot in orbe Europaeo ex literatis degunt: apud quos cum de Ser[enissimae] Vestrae Celsitudinis in solide doctos benignitate agitur, de summa rerum agitur, quae sola in ceterarum rerum ingrato silentio nunquam silere potest. Non igitur non possum solus inter ipsos animi mei erga Seren[issimam] Cels[itudinem] Vestram officiosissimam humilimamque significationem omittere, cum ceteri pluribus ac frequentioribus attestationibus suam erga S[erenissimae] Cels[itudinis] V[estrae] obseruantiam non obscure explicarint. En igitur, Theophrastus Paracelsus, Philosophus Germanus, aliena nunc lingua rediui- [f. ):(3r] nus, pro merito & dignitate comtus, subiectissimi & candidissimi animi mei signum, Ser[enissimae] Vestrae Celsitudinis benignissimas manus, diuinum caput, auxilium & patrocinium clientum extremum, vt hilari fronte excipiatur, perque luminis S[erenissimae] Cels[itudinis] Vestrae splendorem enitescat, & ab aemulis obtrectatoribus defendatur, humilime obsecrat, inuocat, implorat. Spe certa ac fiducia erectus obfirmatusque amplissima, fore omnino, vt qva gratia olim apud Augustiss[imum] Imperator[em] Diu. Carolum V. incoram, & postea Maximilianum II. Serenissimae Vestrae Celsitudinis Auum ac Proaaum, Bodensteinii optimi Medici promitione suffultus praeualuit, eadem aut maiore etiam elementia apud Sereniss[imam] V[estram] Cels[itudinem] nunc quoque intro admittatur & gratus veniat. Qua quidem gratia dignissimus comprimis est, partim ob insignia paradoxa, quibus a ceteris plerisque omnibus Philosophis honesto ac plane Philosophico instituto discessit: partim ob rerum abstrusarum, arcanorumque chymicorum plurimorum, a medicis aliis supina oscitantia hactenus transsultorum, absolutissimam cognitionem, qua mirifice praemicuit. Taceo hoc, quod vel iam ante pridem Sereniss[imae] Vestrae Celsitudinis prouinciae haud paucae, vt Austria, Stiria, Carinthia &c. Paracelsum hunc veluti genium quendam domesticum sibi totum appropriarint, ac veluti ob possessionem singularem non tenuiter sese iactarint & extulerint. Accipiat igitur Imperator Inuictissimus, Monarchae Terrarum, Theophrastum Monarcham [f. ):(3v] Medicorum, appotrecta manu, vultuque benigno, tanquam humilimi & subiectissimi mei cultus tesseram publicam, ac conatus meos laboriosos simul ac sumtuosos, quos in Serenissimam Celsitudinem eius velut Numen quoddam lubens volensque dirigo, sibi vnice clementissimeque placere sinat. Pro qua Clementia summus coeli terraeque Monarcha, qui nutu suo vniuersum orben torquet, longaeuos annos, vigorem animi viuidum, ac longe lateque pacatum & florens imperium Serenissimae Vestrae Cels[itudinis] vbertim retribuat ac refundat. Datae Francofurti in meo vrbano.
Vestrae Ser[enissimae] Cels[itudinis] Humilimus cliens & seruus Ad pedes positus
Zacharias Palthenius D[octor].
