Dedication, 1626-07-16, Joachim Morsius to Gerhard Culemann

Author:	Joachim Morsius
Recipient:	Gerhard Culemann
Type:	Dedication
Date:	16 July 1626
Place:	no place
Pages:	5
Language:	Latin

Quote as:

https://www.theatrum-paracelsicum.com/index.php?curid=1119

Editor:	Edited by Julian Paulus
Source:	Nuncius Olympicus, ed. Joachim Morsius, ‘Philadelphia’ 1629, sig. A2r-A4r

Back to Paratexts Back to Texts by Joachim Morsius

[sig. A2r] Reverendo, Clarißimo, variâq́ue doctrinâ & virtute præstantißimo viro, Gerhardo Culemanno, Præposito Ecclesiæ Rensburgensis laudatissimo, amico suo plusquàm fraterno amore ætatèm prosequendo, Anastasius Philaretus Cosmopolita, Salutem corporis & animæ perennem.

Reverende & Clarißime Culemanne, amice fraterrime, En tibi Catalogum Manuscriptorum Codicum, quem apud me vidisti, dum mensibus aliquot retrò Rensburgum transii, & virum nobilißimum avidè expetere affirmas! Curavi aliquot ejus exemplaria typis vulgari, ut eo commodius inter quosdam Christianorum Regum ac Principum Consiliarios & Bibliopolas distribui, liberalesq́ue & munifici patroni ac industrii typographi, ad editionem tam egregiis & pretiosissimis operibus excitari possent. Tu suadâ tuâ aureâ in Serenissimi & Magnanimi Regis Daniæ Aula: ac in vicinâ Potentißimi & Pacifici Holsatiæ Ducus, per Illustres & Generosos Heroes, Dn. Olighe- [sig. A2v] rum Rosæcrantzium, Dn. Georgium ab Alefeld, Dn. Otthonem à Povvisch, Dn. Henricum à Qualen, Dn. Henricum Blumium. aliosq́ue magni veri in Naturâ ac scripturâ absconditi, indagatores lectißimos, causam communis boni strenuè age. Nunquam suffragantibus superis me pænitebit consilii, te suscepti Christiani obsequii.

Utinam multi Reges & Principes sumptus quos prodigaliter in milites feroces & truculentos grassatores ac publicos homicidas impendunt, dum ditiones suas evertunt non gubernant, dißipant non custodiunt, subditosq́ue devorant non pascunt, et materiam seditionibus, incrementa miseriis, causam fletibus ubiq́ue suppeditant, militibus in Theosophiæ castris adversus mundum & triumphantem in eô inscitiam ac impietatem indefesso studio militantes impenderent, felicius res humanæ & maiore cum ipsorum gloriâ, gubernarentur.

Duplex enim est milita (ut pulcherrimè Ferrandus Diaconus in Parænetico suo, qualis esse debeat Dux religiosus in actibus militaribus ad Reginum Comitem, scribit:) & duo genera militum sunt. Alios militia corporalis laborare cum mundo, secundum volun- [sig. A3r] tatem terreni Regis astringit. alios milita spiritualis ad cœlestia castra, per gratuitam gratiam cœlestis Imperatoris, adducit. Milites sæculi passionibus & desideriis variis tenentur obnoxii, milites Dei carnem suam crucifixerunt cum vitiis & concupiscentiis. Illi dapibus nutriuntur, isti virtutibus. illi rapere aliena conantur, isti etiam propria vel perdere, vel misericorditer erogare. illi quærunt undè falsis laudibus extollantur, isti quærunt undè sempiternis præmiis honorentur. illis tribuit imaginem lætitiæ vanitas, istis vera confert gaudia veritas. illi suis utilitatibus consulunt, isti communibus: illi perituram patriam, perituri salvare festinant, isti nunquam perituram nè in æternùm pereant, possidere desiderant. illis vivere labor est & mori supplicium, istis vivere Christus est, & mori lucrum. illi præliantur contrà visibiles, isti contra invisibiles inimicos. illos avaritia curdeles, istos misericordia benignos. illos invidia contentiosos, istos facit mansuetudo pacificos. illi per superbiam pro suis honoribus litigant, isti per humilitatem alter alterum existimant superiorem sibi. Per illos Babylonia regitur, per istos & in istis à Domino Hierusalem cælestis administratur. Et plerumque contingit ut corporibus adunati, quamvis mentibus separati, simul milites Dei & milites sæculi prosperitates & adversitates sentiant temporales. Sed milites [sig. A3v] sæculi porsperitas extollit, adversitas dejicit. milites autem Dei sive in prosperitate, sive in adversitate immobiles perseverant. quia gloria eorum testimonium est conscientiæ. Ubi requiscunt, quando tribulationes patitur mundus: uti timent hostem continentiæ perpeti, quando suppetit abundantia voluptatum. Nam de radice temporalis felicitatis germinant spinæ carnalis cupiditatis. milites Dei libenter audiunt Beatum Johannem commilitonibus propriis, tubâ fortiore clamantem: Nolite diligere mundum, neque ea quæ in mundo sunt, quæ si quis diligit non est charitas patrus in eo. Quoniam omne quod in mundo est, concupiscentia carnis est, & concupiscentia oculorum, & ambitio sæculi, quæ non est ex patre, sed ex mundo est, & mundus transit & concipiscentia eius, qui autem facit voluntatem Dei, manet in æternum. Quibus audientibus atque obedientibus huic saluberrimæ admonitioni, quoties occulta dispensatio piissimi Redemptoris potestatem judicandi ac disponendi terrenam Rempublicam tribuit, tunc ex parte milita sæculi, non est gravioribus referta peccatis, tunc facilè corropiuntur inquieti, consulantu pusillanimes, suscipiuntur infirmi, licentia scelerum demitur improbis, & benè agendi sortitur innocentia libertatem. Rogemus [sig. A4r] ergo precibus assiduis eum, qui disponit orbem terræ in æquitate, faciens universa secundum consilium voluntatis suæ quoniam de ipso Psalmista veraciter: Omnia quæcunq́ue voluit fecit in cælo & in terrâ, in mari & in omnibus abyßis, ut milites suos sub habitu militiæ sæcularis latentes, promovere dignetur ad maximas dignitates, regens eos intus, & regendis aliis scientiam tribuens. Voveo ego ut quos dedit, diu florentes & incolumes nobis conservet, & ut supra cognatam utramque familiam Danicam & Holsaticam augustissimam, Spiritus timoris Domini, pietatis, scientiæ, fortitudinis, consilii, intellectus, sapientiæ, perpetuò requiescat. Vale mi Reverende & eruditissime Culemanne, meque & mea studia Ecclesiæ & literis solidè devota, in meditationibus & soliloquiis tuis sacris sedulò Deo T[er] O[ptimo] M[aximo] Commenda. Dabam volante calamo XVI Julij, Anno Christi M. DC. XXVI. Philadelphiæ.

Apparatus

Corrections