Dedication, 1602-09-13, Lazarus Zetzner to Frederick I, Duke of Württemberg

From Theatrum Paracelsicum
Revision as of 18:48, 28 September 2022 by JP (talk | contribs)
Author: Lazarus Zetzner
Recipient: Friedrich I. Herzog von Württemberg
Type: Dedication
Date: 13 September 1602
Place: Straßburg
Pages: 3
Language: Latin
Quote as: https://www.theatrum-paracelsicum.com/index.php?curid=789
Editor: Edited by Julian Paulus
Source: Theatrum chemicum, v. 1, Cornelius Sutor (Oberursel) für Lazarus Zetzner (Straßburg) 1602, f. )(r2–)(3r
Back to Paratexts
Back to Texts by Lazarus Zetzner

[f. )(2r] Illvstrissimo Principi ac Domino, Domino Friderico Dvci Wirtembergensi & Teccensi, Comiti Montis Belgarum, Domino in Saxenheim, &c. Domino suo clementissimo. S[alutem] D[icit].

EA plerisque in facultatibus bonisque artibus per annos iam aliquot ab artificibus adhibita fuit diligentia, illustrissime Princeps, Domine Clementissime: vt singuli Tractatus & libri de singulis materiis à diuersis elaborati auctoribus, & distinctis in lucem temporibus seorsim editi, vnum in corpus & volument coacti, singularum artium & facultatum cultoribus exhiberentur. Quae sane res in eum potissimum suscepta finem esse videtur: vt quae scripta in singulis scientiis dissipata lateque dispersa iacerent: nec sine molestia & sumptu passim conquisita legerentur: ea in vnum volumen ad hunc modum redacta, omnem totius artis, vel sane praecipuum apparatum, veluti pulcerrimo quodam in theatro cum voluptate intuendum spectandumque studiosis proponerent: vnde hi, tanquam ex horto [f. )(2v] quodam bene culto & artificiose disposito, omnis generis herbas salutares, flosculos item frucusque varios ad suam singuli non solum vtilitatem, sed etiam oblectationem possent decerpere. Hunc ipsum finem atque vsum in praesenti quoque materia rerum Chemicarum mihi proponendum esse censui. Et quoniam permulti praestantes summisque ingeniis praediti, & singulari sapientia ornati homines, tam nostro hoc tempore, quam seculis superioribus de hac arte multa praeclare ac diuinitus quasi diuersis in locis scripserunt: ego illorum opera, quotquot indagari quidem potuerunt, magno sumptu & labore vndique conquisita, vnum in corpus, & quasi Theatrvm quoddam digeri, disponique curaui: Spe optima ductus, fore vt hac mea opera studiosis philosophiae Chemicae non iniucundum ingratumve praestarem officium: qui hac occasione diuersis auctoribus inter se collatis, alia ex aliis colligere facilius, atque hoc modo propositi sui metam contingere possent commodius, Vestrae autem Celsitudini, Princeps illustrissime, Domine clementissime, Theatrvm hoc Chemicvm inscribere ac dedicare humiliter volui: cum quod me non fugiat, quam clementi plane atque laudabili fauore & amore V[estrae] Cels[itudinis] artes Chemicas complectatur atque foueat: tum quod non solum in aliis scientiis vsitatum: verum etiam in hac nostra Chemica prorsus necessarium sit, edendis operibus pa- [f. )(3r] tronos ac fautores quaerere: quorum protectione & auctoritate illa tuto exiere, & in luce publica versari possint. Quam obrem ea, qua possum, animi submissione, hoc ipsum Theatrvm Chemicum V[estrae] C[elsitudini] offero & dedico: simulque humiliter rogo: vt C[elsitudo] V[estra] sereno id benignoque vultu suscipere, illustrissimaque sua protectione defendere atque tueri clementissime dignetur. Deum opt[imum] max[imum] toto pectore precor, vt Celsitud[o] V[estra] cum illustrissima coniuge, totaque inclita domo VVirtembergica florentem diu, incolumen atque superstitem conseruet ac tueatur. Argentinae. Id[ibus] Septemb[ris] Anno 1602.

V[estrae] Cels[itudinis] Subiectiss[imus]

Lazarvs Zetznervs Bibliopola ibid[em]