Dedication, no date (1569), Thomas Erastus to Georg Ernst Graf von Henneberg-Schleusingen and Poppo X. Graf von Henneberg (BP.Erastus.1569-01)
| Author: | Thomas Erastus |
| Recipients: | Georg Ernst Graf von Henneberg-Schleusingen Poppo X. Graf von Henneberg |
| Type: | Dedication |
| Date: | no date [1569] |
| Place: | no place |
| Pages: | 2 |
| Language: | Latin |
| Quote as: | https://www.theatrum-paracelsicum.com/index.php?curid=2976 |
| Editor: | Edited by Julian Paulus |
| Source: | Thomas Erastus, Defensio Libelli Hieronymi Savonarolae de Astrologia Diuinatrice, [Genève]: Jean Le Preux and Jean Petit 1569, sig. *2r–*2v [BP.Erastus.1569-01]
|
| Back to Paratexts Back to Texts by Thomas Erastus |
[sig. *2r] Illvstrissimis Imperii Principibvs, Comitibvs ac DD[ominis] Hennenbergensibus, &c. D[omino] Georgio Ernesto, & D[omino] Bopponi, fratribus, DD[ominis] suis clementißimis.
Tandem ad vos mitto, Principes illustrissimi ac clementissimi, defensionem Hieronymi Sauonarolæ aduersus Christophorum Stathmionem Medicum Coburgensem, ante decennium istic Germanicè scriptam, vestræque C[omitibus] destinatam. Latinam ex Germanica duabus de causis feci. Prima est, quia inter ignaros Latinæ linguæ perpaucos esse animaduerti, qui has disputationes intelligere possint. requirit enim saltem principiorum Philosophiæ notitiam aliquam, quæ à nostris hominibus vix aliunde, quàm ex Latinis aut Græcis autoribus peti potest. Altera est, quia non satis aptè mihi videbar nostrate lingua exprimere posse, quæ vsitatè apud Latinos dicuntur. Etenim qui Germanicè philosophiam tractarit, scio neminem. Proinde meritò verebar, vt vel non satis aptè res istas eloquerer: vel certè non magno cum fructu tractarem: quòd intelligerem peritos Latini serminis sic ferè affectos esse, vt libentiùs meliùsque intelligant ha- [sig. *2v] rum rerum explicationes Latinas, quàm Germanicas. Vt enim quædam videantur significantiùs Germanicè quàm Latinè[c1] dici posse, non tamen ea multa sunt: nec assueuerunt multi philosophicis illis sententiis loquendíque modis.
Quòd non temporiùs in lucem venire passus sum præsentem Apologiam, effecerunt partim multæ & variæ occupationes aliæ: partim quòd audieram alios quosdam bellum Sauonarolæ mihíque indixisse. Horum ergo copias dum coniungi cum illo cupio, vt vna pugna & huic & illis occurram, editionem differo. Sanè credidi aliquos ex ipsis prodituros, propterea quòd alii publicè editis libellis prognosticis minitarentur: alij autem priuatim ad Stathmionem aliósque scriptis literis ex alto descpicere argumenta Sauonarolæ viderentur. Iam verò quum & ocij plusculum fuissem nactus, & aliæ me præterea occasiones ad editionem hortarentur, quas recensere hoc loco non est opus, statui eam publicare, & ad vos, illustrissimi Principes, vt est æquum, transmittere. Primùm quidem, quia vestræ Celsit[udinis] nomine suscepta à me fuit. Deinde quia vobis hoc vnum maximè scio esse cordi, vt impietate omni sublata, Deus verus rectè ac purè iuxta præscriptim verbi sui colatur. Præterea quia non dubito permultos alios fore, qui exemplis tantorum ac talium Principum moti, diligentiùs de hisce rebus sint cogitaturi. Postremò vt meæ erga vestram Celsit[udinem] perpetuæ constantísque obseruantiæ hoc etiam testimonium extet. Deus opt[imus] max[imus] pater Domini nostri Iesu Christi. V[estram] C[elsitudinem] clementer tueatur, sanctissimóque suo Spiritu sic regat, vt nomen eius per vos à plurimis laudetur & honoretur. Amen.
English Raw Translation
Generated by ChatGPT-4 on 15 August 2023. Attention: This translation is a machine translation by artificial intelligence. The translation has not been checked and should not be cited without additional human verification.
